Тавантолгой түлш ХХК 2026-2027 оны халаалтын улиралд нийслэлийн долоон дүүргийн хэмжээнд 446 цэгээр "Хотула" аппликейшн болон иргэний үнэмлэхээр шахмал түлш худалдан борлуулж байна.
Тавантолгой түлш ХХК-ийн Гүйцэтгэх захирал С.Даваасүрэн "Энэ жил мидлинг буюу завсрын бүтээгдэхүүнээр түлш үйлдвэрлэхгүй. Зөвхөн нийслэлчүүдэд зориулан "Эрдэнэс Тавантолгой" ХК-ийн угааж баяжуулсан эрчим хүчний нүүрсээр шахмал түлш үйлдвэрлэн худалдаанд гаргасан. Ингэснээр шинэ түүхий эдээр илүү чанартай бүтээгдэхүүн үйлдвэрлэж байна. Мөн түлшний жин, хэмжээ дутах асуудал гарахгүй. Бид үйлдвэртээ 25.5 кг-аар жингийн тохируулга хийсэн" гэв.
Мөн тэрээр иргэдийн нөөцлөх хүсэл, шаардлагыг ойлгож байгаа ч хангамжаас шалтгаалан одоогоор долоон шуудайгаас илүү түлш худалдах боломжгүй байгааг хэллээ.
