Пүрэв гарагт болсон халдлагын нөлөө Молдав, Румын улсын нутаг дэвсгэрт ч хүрчээ. Румын улс Оросоос хөөргөсөн гэж үзэж буй тэсрэх бодис ачсан тэнгисийн дрон тус улсын далайн эрэг орчмын байгалийн хийн төслүүдийн нэгийг онилсон гэж мэдэгдсэн байна.

Украин руу хийсэн халдлагын үеэр Оросын нэг дрон Румыны нутаг дэвсгэрт унасан гэж тус улсын Батлан хамгаалах яам мэдэгдсэнийг Reuters мэдээлжээ. Уг дрон Украины хилтэй ойролцоох Тулча тойргийн хүн суурьшдаггүй газарт унасан байна. Дайны туршид Оросын дронууд Румыны агаарын орон зайг удаа дараа зөрчиж байсан юм.

Үүний дараа Румыны Батлан хамгаалах яам далайн эрэг орчмын байгалийн хийн төслийн ойролцоо тэсрэх бодис ачсан тэнгисийн дроныг устгахаар хоёр F-16 сөнөөгч онгоц хөөргөсөн гэж нэмж мэдээлжээ.

Гадаад хэргийн сайд Оана Цою Оросыг Хар тэнгис болон Румыны эрчим хүчний дэд бүтцэд учруулж буй эрсдэлийнхээ төлөө "хариуцлага хүлээх ёстой" гэж мэдэгдсэн байна.

Европын Комиссын Ерөнхийлөгч Урсула фон дер Ляйен тэсрэх бодис ачсан тэнгисийн дроны үйл явдлыг “эрлийз дайн”-ы нэг жишээ гэж тодорхойлжээ. Тэрбээр иргэдийг түгшээж, Европын Холбооны эв нэгдлийг задлах зорилготой заналхийллийн кампанит ажил эрчимжиж байна гэж мэдэгдсэн байна.

Молдавын Ерөнхийлөгч Майя Санду мөн пүрэв гарагт тус улсын агаарын орон зай дахин зөрчигдсөн бөгөөд нэг дрон Молдавын нутаг дэвсгэрт унасан гэж мэдэгджээ.

Тэрбээр “Оросын халдлагыг зогсоохын тулд илүү хүчтэй дарамтад оруулах ёстой”  гэжээ.

Үүний зэрэгцээ Польш улс Украин руу чиглэсэн халдлагын үеэр агаарын орон зайгаа хамгаалах зорилгоор урьдчилан сэргийлэх цэргийн нисэх хүчний ажиллагаа эхлүүлсэн гэж Reuters мэдээлсэн байна.