Холбооны шүүхэд гаргасан шинэ нэхэмжлэлд талийгаач поп од Майкл Жексоныг олон жилийн турш ах дүүст мансууруулах бодис өгч, хүчирхийлж, бэлгийн дарамт үзүүлсэн “давтан хэрэг хийсэн” гэж буруутгажээ.
Калифорнийн холбооны шүүхэд баасан гарагт гаргасан уг гомдлыг Эдвард, Доминик, Алдо Кашио нар болон тэдний эгч Мари-Николь Порте нар гаргасан байна. Нэхэмжлэлд Michael Jackson Company болон Жексоны өв хөрөнгийг хариуцдаг байгууллагын зарим хүмүүсийг мөн нэрлэжээ.
Нэхэмжлэлд дурдсанаар Жексон Кашио гэр бүлийн тэргүүнтэй анх танилцахдаа түүний ажилладаг зочид буудалд байнга очдог байсан бөгөөд үүнээс хойш хүүхдүүдтэй ойртож, бага наснаас нь “итгэлийг нь олж, тархи угааж”, мансууруулах бодис, архи өгч, порнограф материал үзүүлэн тэднийг өөрийн үйлдэлд дасгахыг оролдсон гэжээ. Мөн зочид буудлын ажилтнууд уг хүчирхийллийн талаар мэдэж байсан төдийгүй тусалж, зохион байгуулсан байж магадгүй талаар гомдолд дурдсан байна. Тэд хамт аялж байх үед Жексоныг хүүхдүүдтэй ойр өрөөнд байрлуулж өгдөг байсан гэжээ.
Кашиогийн ах дүүс өмнө нь Жексоныг хүүхдийн хүчирхийллийн хэрэгт буруутгасан мэдэгдлүүдийг үгүйсгэн түүний нэр хүндийг хамгаалж байсан. Харин 2019 онд Leaving Neverland баримтат кино гарсны дараа тэд өөрсдийн туршлагыг “анх удаа ойлгож ухаарсан” гэж мэдэгдсэн байна.
Нэхэмжлэлд “Leaving Neverland кино нь нэхэмжлэгчдэд болж өнгөрсөн зүйлсийг ойлгуулж, Жексоны үйлдэл буруу байсан бөгөөд тэдэнд ноцтой сэтгэлзүйн хохирол учруулсныг ойлгуулсан” гэж дурджээ.
Кино гарсны дараа Жексоны өв хөрөнгийг хариуцагчид уг баримтат киног “худал мэдээлэлтэй, шар хэвлэлийн шинжтэй гүтгэлэг” гэж няцаасан юм.
Жексон 2009 онд нас барсан бөгөөд үүнээс өмнө 2005 онд хүүхдийн бэлгийн хүчирхийллийн хэрэгт буруутгагдсан бүх заалтаар цагаатгагдсан байдаг. Харин 1994 онд өөр нэг хүүхдийн хүчирхийллийн гомдлыг сая сая доллараар тохиролцож шийдсэн ч тэрээр өөрийгөө гэм буруугүй гэж мэдэгдсээр байсан юм.
Нэхэмжлэлд мөн Жексоны нас барсны дараа түүний өв хөрөнгийг хариуцагчид нь Кашиогийн ах дүүсийг хариуцлагаас чөлөөлөх тохиролцоонд гарын үсэг зуруулж, ирээдүйн бүх гомдлыг нууц арбитрын журмаар шийдэх гэрээнд хуурч оруулсан гэжээ.
Жексоны өв хөрөнгийг төлөөлж буй өмгөөлөгч Мартин Сингер уг нэхэмжлэлийг “мөнгө авах гэсэн цөхрөнгүй оролдлого” гэж нэрлэсэн байна.
Тэрээр мэдэгдэлдээ “Энэ гэр бүл 25 гаруй жилийн турш Майкл Жексоныг тууштай хамгаалж, түүнийг буруугүй гэж баталж байсан. Шинэ нэхэмжлэл нь түүний өв хөрөнгөөс хэдэн зуун сая ам.доллар авах зорилготой ил тод оролдлого” гэжээ.
Нэгдүгээр сард Кашио нар Беверли Хиллсийн шүүхэд очиж уг “тохиролцооны гэрээг” хүчингүй болгуулахыг хүссэн бол Жексоны тал маргааныг арбитрт шилжүүлэх хүсэлт гаргасан байна. Шүүгч одоогоор шууд шийдвэр гаргахаас татгалзаад буй.
