АНУ-ын Төрийн департамент виз мэдүүлэгчдээс 15 000 ам.доллар хүртэл барьцаа төлөхийг шаардах жагсаалтад 12 улсыг шинээр нэмлээ.
Өчигдөр (2026.03.18) өргөтгөсөн нь Ерөнхийлөгч Доналд Трампын захиргаанаас хэрэгжүүлж буй цагаачлалыг хязгаарлах бодлогын сүүлийн алхам юм. Энэ бодлого нь голчлон Барууны бус орнуудаас АНУ-д нэвтрэх хөдөлгөөнийг хязгаарлах зорилготой.
Шинээр нэмэгдсэн 12 улс орсноор уг хязгаарлалтад хамрагдсан улсын нийт тоо 50 болж байна. Эдгээрийн ихэнх нь Африкийн орнууд бөгөөд өндөр хэмжээний барьцаа нь бага орлоготой зорчигчдыг ялгаварлан гадуурхаж байна гэж шүүмжлэгчид үзэж байна. Харин Трампын засаг захиргаа энэхүү бодлогыг визийн хугацаа хэтрүүлэн хууль бусаар оршин суух явдлыг бууруулах арга гэж хамгаалжээ.
Төрийн департамент мэдэгдэлдээ “Визийн барьцааны хөтөлбөр нь визийн хугацаа хэтрүүлэн АНУ-д хууль бусаар үлдэх хүмүүсийн тоог эрс бууруулахад аль хэдийн үр дүнтэй болох нь батлагдсан” гэж дурдсан байна. Мөн ойролцоогоор 1000 визийг энэ хөтөлбөрийн хүрээнд олгосон бөгөөд хүлээн авагчдын 97 хувь нь визийн хугацаандаа багтаж АНУ-аас гарсан гэж тайлбарлажээ.
Энэхүү барьцааг бизнесийн (B-1) болон аялал жуулчлалын (B-2) виз мэдүүлэгчдэд ногдуулдаг. Барьцааны хэмжээ 5000 ам.доллар, 10 000, ам.доллар, 15,000 ам.доллар гэсэн гурван шатлалтай.
“Хэмжээг визийн ярилцлагын үеэр тогтооно” гэж Төрийн департамент цахим хуудсандаа мэдэгдсэн байна. Барьцаа төлсөн нь виз заавал олгогдоно гэсэн баталгаа биш юм. Хэрэв визийн хүсэлтээс татгалзвал, АНУ-д нэвтрэхгүй бол, эсвэл визийн нөхцөлийг мөрдвөл барьцааг буцаан олгоно.
Шинээр жагсаалтад нэмэгдсэн улсууд:
Эдгээр улсын иргэдэд барьцааны шаардлагыг дөрөвдүгээр сарын 2-ноос хэрэгжүүлж эхэлнэ. Төрийн департамент цаашид ч “цагаачлалын эрсдэлийн хүчин зүйлс”-ээс хамааран жагсаалтыг өргөтгөх боломжтойг мэдэгдсэн байна.
2025 оны нэгдүгээр сард Цагаан ордонд эргэн ирснээсээ хойш Доналд Трамп хууль ёсны болон хууль бус цагаачлалыг, ялангуяа ядуу болон Барууны бус орнуудаас ирэх урсгалыг хязгаарлах бодлогыг эрчимжүүлсэн.
Энэхүү барьцааны хөтөлбөрийг анх өнгөрсөн оны наймдугаар сард танилцуулж байсан бөгөөд тухайн үед засаг захиргаа үүнийг төрийн орлогыг нэмэгдүүлэх, богино хугацааны зорчигчдын шалгалтыг чангатгах хэрэгсэл гэж тайлбарлаж байв.
Трамп өмнө нь 2020 онд, анхны бүрэн эрхийн хугацааныхаа сүүлчийн жилд ижил төстэй хөтөлбөр хэрэгжүүлэхийг оролдож байсан ч COVID-19 цар тахлын улмаас хэрэгжиж чадаагүй юм.
Харин хоёр дахь бүрэн эрхийн хугацаандаа тэрээр цагаачлалыг хязгаарлах бодлогоо улам чангатгасан байна.
Түүнчлэн:
Мөн засаг захиргаа цагаан арьст Өмнөд Африк иргэдийг хэлмэгдүүлэлтэд өртөж байна гэж үзэн дүрвэгсдийн бодлогод давуу эрх олгохоо мэдэгдсэн.
Эдгээр хатуу бодлого нь аялал жуулчлалд нөлөөлж, АНУ, Канад, Мексик хамтран зохион байгуулах удахгүй болох Хөлбөмбөгийн дэлхийн аварга шалгаруулах тэмцээнд оролцогчдын нэвтрэх боломжид ч эргэлзээ үүсгээд байна.
