Улсын II дугаар төв эмнэлгийн Эрхтэн шилжүүлэн суулгах төв богино хугацаанд ашиглалтад орж, дурангийн болон бичил мэс засал, мэдээгүйжүүлэг, лабораторийн хамгийн сүүлийн үеийн тоног төхөөрөмжөөр хангагджээ.
Шинэ төвийн нээлтээс хойш 43–65 насны таван хүнд амьд донороос дурангийн аргаар элэг шилжүүлэн суулгаад байна.
Мөн 11 хүнд зүрхний титэм судасны дотуурх хэт авиан оношилгоо, эмчилгээ, 8 хүнд хавдар хөлдөөх эмчилгээ хийхээс гадна элэг, улаан хоолой, ходоод, бүдүүн гэдэс, уушгины хавдрын 1,000 гаруй дурангийн мэс заслыг амжилттай хийж гүйцэтгэв.
Энэ төв ашиглалтад орсноор эрхтэн шилжүүлэн суулгах мэс засал нутагших, эмч нарын чадавх дээшлэх, гадаадад өндөр зардлаар эмчлүүлэх иргэдийн тоог бууруулах боломж бүрдсэн аж. Гадаад орнуудад элэг шилжүүлэн суулгуулах зардал 150–500 сая төгрөг байгаа юм.
Ирэх оноос амьд донороос бөөр шилжүүлэн суулгах болон робот мэс засал, амьгүй донороос элэг шилжүүлэн суулгах технологийг нэвтрүүлэхээр төлөвлөж байна.
