БНХАУ-ын Хайнань мужийн Саньяа арал дээр болсон Азийн элсний VI наадамд Монгол Улсаас чөлөөт бөхийн дөрвөн тамирчин оролцсон юм. Анх удаа элсний наадамд барилдсан 18 настай Д.Эрдэнэцэцэгтэй ярилцлаа. Тэрээр чөлөөт бөхөөр зургаан жил хичээллэж байгаа бөгөөд Азийн элсний наадамд анх удаа өрсөлдсөн юм. 

-Азийн элсний наадамд оролцсон залуу тамирчны хувьд сэтгэгдлээ хуваалцаач? Элсний наадмын өрсөлдөгчид ямар байсан бэ?

-Элсний наадамд анх удаа оролцоод маш сайхан энерги авлаа. Азийн орнуудын шилдэг тамирчид ирдэг гоё тэмцээн болдог юм байна. Энэ тэмцээнээс их зүйлийг ойлгож авсан. Ялалт, ялагдал гээд өрсөлдөөн ихтэй тэмцээний оролцогчийн нэг байж чадлаа. Бас элсэн дээр барилдана гэдэг өөр юм байна. Өрсөлдөгч бөхтэйгээ илүү сайн ажиллах гээд давуу талууд их байлаа. Надад үнэхээр сонирхолтой байсан. Хэдийгээр медалийн төлөө барилдаж чадаагүй ч гэсэн тамирчид сайн бэлтгэлтэй ирдэг юм байна. Бидний хувьд элсний бэлтгэл бага ч гэлээ аль болох сайн оролцохыг хичээсэн.

-Өрсөлдөгч орны тамирчдыг хараад юу бодогдож байв? Элсний бэлтгэлийг бага хийсэн гэж сонссон. Энэ талаар та юу гэж хэлэх вэ?

-Бусад орны тамирчдыг харж байхад бид хүчээрээ дутахааргүй юм байна. Харин элсэн дээр яаж ажиллах, яаж барилдах вэ гэдэг дээр анхаарах хэрэгтэй байдгийг олж харлаа. Элсний бөхийн барилдаанд олон орны шилдэг тамирчид ирдэг юм байна. Эндээс маш сайн туршлага хуримтлуулсан. Элсэн дээр барилдах гэдэг бол дэвжээн дээр барилдахаас тэс өөр. Азийн орнууд цуглардаг элсний наадам гэдгээрээ илүү их ач холбогдолтой болдгийг анзаарсан. Манай багаас З.Болортунгалаг мөнгөн медаль хүртлээ. Эгчийнхээ барилдааныг хараад илүү сайн хичээх ёстой юм байна гэж ойлгосон. Энэтхэг, Хятад, Казахстан гээд орны тамирчид хүчтэй байна.   

-Залуу тамирчны хувьд асуух зүйл байна. Тамирчдын тосгонд байрлаж тэмцээнд оролцох үеийн мэдрэмжээсээ хуваалцаач?

-Азийн олимпын зөвлөлөөс хариуцдаг тэмцээн болохоор тэгсэн үү үнэхээр өндөр хариуцлагатай болдог юм байна. Тамирчдын тосгон нь тохижилт, хамгаалалт гээд өндөр түвшинд бэлтгэгдсэн байсан. Азийн аварга шалгаруулах тэмцээн ч юмуу миний оролцож байсан тэмцээнээс тэс өөр орчин угтсан. Тиймээс маш их эрч хүчийг авч чадлаа. Бас залуу тамирчны хувьд үнэхээр туршлага болсон.  

-Азийн элсний наадам учраас зохион байгуулах хорооноос анхаарч ажиллаж чадлаа гэж харж байна. Таны хувьд ямар орны тамирчидтай илүү ойр танилцаж чадсан бэ?

-Тамирчдын тосгонд олон орны нөхөрлөх боломж гарч байсан. Мөн тамирчдын чөлөөт цагийн арга хэмжээ их болдог юм байна. Би Казахстаны тамирчидтай илүү ойр байсан. Олон орны найз нөхөдтэй болох боломж байсан. Тамирчидтай хоолонд орох гээд чөлөөт цагаа сонирхолтой өнгөрүүлсэн.    

-Чөлөөт бөхийн амжилтаасаа дурдаач. Ямар ямар амжилт үзүүлж байсан бэ?

-2018 оноос эхлэн чөлөөт бөхөөр хичээллэж эхэлсэн. Энэ хугацаанд маш олон тэмцээн уралдаанд оролцож ялж, ялагдлаа. Их л юм болсон доо. Би улсын аварга шалгаруулах тэмцээнээс хоёр хүрэл медаль хүртсэн. Хүүхдийн спортын наадмын алтан медальтай. Олон улсын тэмцээний тухайд Улаан-Үдэд болсон тэмцээнээс мөнгө, хүрэл медаль хүртсэн.

-2026 оныг ямар тэмцээнээр эхлүүлж байсан бэ?

-Энэ оны анхны тэмцээн бол Монгол Улсын аварга шалгаруулах тэмцээн байсан. Энэ тэмцээнээс хүрэл медаль хүртсэн. Ер нь оны эхэнд чөлөөт бөхийн тамирчдын хувьд улсын аварга шалгаруулах тэмцээнийг хүлээдэг. Би энэ жил 62 кг-д барилдсан. Дээд жингийнхэнтэйгээ барилдаад хүрэл авсандаа баяртай байгаа.

-Яагаад бөхийн спортыг сонгох болсон бэ?

-Эрэгтэй хүнээс илүү эмэгтэй хүн барилдана гэдэг илүү их хатуу тэвчээр шаардах болов уу. Би өөрөө бөхийн спортыг сонирхож орсон. Нилээн сайн хүсэж барилдах болсон. Бөхийн спортдоо хайртай. Би чөлөөт бөхөөр хичээллээд зургаан жил болчихлоо.

-Чөлөөт бөхийн дэвжээ нэг өөр. Гэтэл та өнөөдөр Азийн элсний наадамд амжилтаа бичлээ. Элсний бөхөөр барилдах сайхан нь юу байсан бэ?

-Элсний наадамд олон тамирчин ирдэг юм байна. Манай улсаас дөрвөн тамирчин оролцсон. Би хамгийн залуу тамирчин нь байсан. Элсэн дээр барилдах нь дэвжээн дээр барилдахаар тэс өөр. Элсний бөхийн дүрэм манай үндэсний бөх шиг адилхан. Өвдөглөж болохгүй, өрсөлдөгчөө элсний тойргоос түрүүлж гаргаж чадвал илүү оноо авна. Элсэн дээр барилдах явцад их олон мэх сурах, бас өрсөлдөгчийн сул давуу талыг харах гээд ажиллагаа их шаардсан. Хятад, Киргиз, Энэтхэгийн бөхчүүд хүчтэй байна. Энэ тэмцээн миний хувьд анхных байсан болохоор их том сургамж боллоо. Элсний бөхөд чөлөөт бөхөөс ялгаатай зүйл их бий. Жингийн ялгаа, 3 оноо түрүүлж авбал ялалт байгуулна гээд ялгаатай зүйл их байсан. Гэхдээ энэ тэмцээнээс маш их туршлага хуримтлуулж чадлаа. Мөн Азийн элсний наадам том хэмжээнд зохион байгуулагддаг юм байна.