Хоёр Солонгосын багуудын хооронд болох ховор хөлбөмбөгийн тоглолтын тасалбарууд геополитикийн хурцадмал байдал үргэлжилж байгаа ч хэдхэн цагийн дотор зарагдаж дуусжээ.

Солонгосын Хөлбөмбөгийн холбооны мэдээлснээр, тавдугаар сарын 20-нд болох Эмэгтэйчүүдийн Азийн Аваргуудын лигийн хагас шигшээ тоглолтын 7087 энгийн тасалбар мягмар гарагт худалдаанд гарснаас хойш 12 цагийн дотор бүрэн дууссан байна.

Тоглолтод Өмнөд Солонгосын Suwon FC Women болон Умард Солонгосын Naegohyang Women's FC багууд өрсөлдөнө.

Тоглолт Өмнөд Солонгосын нийслэл Сөүлэс өмнө зүгт ойролцоогоор 35 км зайд байрладаг Сувон хотод болно.

Naegohyang Women's FC нь 2018 оноос хойш Өмнөд Солонгост тоглох анхны Умард Солонгосын спортын баг болж байна.

2012 онд Пёньян хотод байгуулагдсан тус баг энэ амралтын өдрүүдээр БНХАУ-аар дамжин хөрш улс руу зорих төлөвтэй байгаа аж.

Өмнөд Солонгосын Нэгдлийн яам өмнө нь мэдэгдэхдээ тоглолтод оролцох Умард Солонгосын төлөөлөгчдийн бүрэлдэхүүнд 27 тоглогч, 12 ажилтан багтсан бөгөөд өрсөлдөгч багийн хамт Сувон дахь нэгэн зочид буудалд байрлах төлөвтэй байгаа аж.

Азийн Аваргуудын лиг нь үндэсний шигшээ багийн биш, клубийн тэмцээн тул тоглолтын үеэр төрийн далбаа болон төрийн дуулал ашиглахгүй гэж орон нутгийн хэвлэлүүд мэдээлжээ.

Мөн Умард Солонгосын иргэдийг Өмнөд Солонгост нэвтрүүлэхийг ерөнхийдөө хориглодог учир хөгжөөн дэмжигчид дагалдан ирэхгүй.

Өмнөд Солонгосын Нэгдлийн яам хоёр багийг хамтдаа дэмжих арга хэмжээ зохион байгуулахаар бэлтгэж буй иргэний нийгмийн байгууллагуудад 300 сая вон буюу 200 мянган ам.долларын дэмжлэг үзүүлэхээр төлөвлөж байгаагаа мэдэгдэв.

Тоглолтын ялагч тавдугаар сарын 23-нд Сувонд болох финалд Австралийн Melbourne City FC Women эсвэл Японы Tokyo Verdy Beleza багийн аль нэгтэй тоглоно.

Умард Солонгос эмэгтэйчүүдийн хөлбөмбөгөөр, ялангуяа өсвөрийн ангилалд олон жилийн турш хүчирхэг баг байсаар ирсэн. Тэд сүүлийн жилүүдэд хэд хэдэн дэлхийн аварга цол хүртсэн бөгөөд өнгөрсөн жил FIFA U-17 Women's World Cup-ын финалд Нидерландыг 3:0-ээр хожиж аваргалсан юм.

Умард Солонгос саяхан Үндсэн хуулиасаа Өмнөдтэй нэгдэхтэй холбоотой бүх заалтыг хасаж, хоёр Солонгосыг тусдаа улс гэж үзэх шинэ чиг хандлагыг илэрхийлсэн.

Шинжээчдийн үзэж буйгаар, эдгээр өөрчлөлт нь Умард Солонгосыг “энгийн улс” мэтээр харуулах зорилготой бөгөөд шинэ найруулгад хөрш улсын эсрэг илт дайсагнасан үг хэллэгээс зайлсхийсэн байна.

Вашингтон дахь Center for Strategic and International Studies-ийн Солонгос хариуцсан дарга Виктор Ча, тус байгууллагын дэд захирал Энди Лим нар энэхүү тоглолт нь хурцадмал харилцааны үед хоёр Солонгосын хоорондын харилцааны ховор суваг болж магадгүй гэж үзжээ. Тэд үүнийг хоёр улсын хоорондын олон жилийн “спортын дипломат ажиллагаа”-ны үргэлжлэл гэж тодорхойлсон байна.

“Пёньян тамирчдаа Өмнөд Солонгос руу явахыг зөвшөөрсөн нь чухал ач холбогдолтой. Учир нь Хойд Солонгос Өмнөдтэй хийх бүх яриа хэлэлцээг зогсоож, Сөүлд хандах “дайсан улс” гэсэн байр сууриа зарласан нөхцөлд ийм алхам хийж байна. Энэ утгаараа хөлбөмбөгийн тоглолт нь соёлын солилцоог улс төрөөс салгаж болох боломжийг харуулж магадгүй” гэж тэд бичжээ.

Өмнөд Солонгосын Кюннам Их сургуулийн Умард Солонгос судлаач Лим Юл Чул AFP агентлагт хэлэхдээ энэхүү тоглолт нь Сөүлд хоёр улсын хооронд “ядаж үндсэн харилцааны суваг” бий болгох боломж олгоно гэжээ. “Энэ нь энх тайван зэрэгцэн орших боломжийг турших нэг боломж болж магадгүй” хэмээн тэр хэлсэн байна.