Хятад, АНУ-ын эдийн засгийн харилцаа нь харилцан ашигтай, хоёр талд хоёуланд нь ялалт авчирдаг шинжтэй гэж Ши Жиньпин АНУ-ын Ерөнхийлөгч Дональд Трамптай хэлэлцээ хийх үеэрээ мэдэгдэв.
“Өчигдөр манай эдийн засаг, худалдааны багууд ерөнхийдөө тэнцвэртэй бөгөөд эерэг үр дүнд хүрсэн. Энэ бол хоёр орны ард түмэн болон дэлхийн хувьд сайн мэдээ” гэж Ши хэлжээ. Тэрбээр худалдааны дайн ялагчгүй байдгийг баримтууд дахин дахин харуулсан гэдгийг онцолсон байна. “Санал зөрөлдөөн, үл ойлголцол байгаа тохиолдолд эрх тэгш зөвлөлдөөн бол цорын ганц зөв сонголт” гэж тэр хэлээд, хоёр тал хамтдаа ихээхэн хүчин чармайлтаар бий болгосон эерэг хандлагаа хадгалахыг уриалжээ.
Ши Жиньпин Тайванийн асуудал нь Хятад-АНУ-ын харилцаан дахь хамгийн чухал асуудал гэдгийг тэмдэглээд, хэрэв энэ асуудлыг зөв зохицуулбал хоёр улсын харилцаа бүхэлдээ тогтвортой байна гэж Трампт хэлжээ.
Харин эсрэгээрээ тохиолдолд хоёр улс мөргөлдөөнд хүрч, бүр зөрчилдөөн үүсэж болзошгүй бөгөөд энэ нь нийт харилцааг ноцтой эрсдэлд оруулна гэж Ши анхааруулсан байна. Ши Жиньпин “Тайванийн тусгаар тогтнол” болон хоолойн хоёр эргийн энх тайван нь “гал ба ус мэт эвлэршгүй” гэдгийг онцолсон байна.
Ши Жиньпин Ерөнхийлөгчөө дагалдан ирсэн бизнесменүүдийг хүлээн авав
Хятадын Ерөнхийлөгч Ши Жиньпин ерөнхийлөгч Дональд Трампын Хятад дахь айлчлалд дагалдан ирсэн АНУ-ын бизнес эрхлэгчидтэй уулзсан байна.
Трамп өөртэй нь хамт АНУ-ын бизнесийн салбарын шилдэг төлөөлөгчид ирсэн, тэд бүгд Хятадыг хүндэтгэж, өндөр үнэлдэг гэж хэлээд, Хятадтай хамтын ажиллагаагаа өргөжүүлэхийг дэмжиж буйгаа мэдэгджээ. Тэрбээр бизнес эрхлэгчдийг Ши Жиньпинд нэг бүрчлэн танилцуулсан байна.
АНУ-ын бизнес эрхлэгчид Хятадын зах зээлд өндөр ач холбогдол өгдөг бөгөөд Хятад дахь үйл ажиллагаагаа гүнзгийрүүлж, хамтын ажиллагаагаа бэхжүүлэх хүсэлтэй байгаагаа илэрхийлжээ.
Ши Жиньпин хэлэхдээ, АНУ-ын компаниуд Хятадын шинэчлэл, нээлттэй бодлогод оролцож ирсэн. Хоёр тал үүнээс ашиг хүртсэн гэж онцолсон байна. Мөн “Хятадын үүд хаалга улам бүр нээлттэй болно” гээд, АНУ-ыг Хятадтай харилцан ашигтай хамтын ажиллагаагаа өргөжүүлэхийг урьжээ. Тэрбээр АНУ-ын компаниуд Хятадад илүү өргөн боломж эдэлнэ гэдэгт итгэлтэй байгаагаа илэрхийлсэн байна.
