Мексикийн аюулгүй байдлын сайдын мэдээлснээр, нөлөө бүхий хар тамхины бүлэглэлийн толгойлогч нас барсны дараа улс даяар хүчирхийлэл дэгдсэн тул 9500 цэрэг нэмж байршуулжээ.
Батлан хамгаалахын сайд Рикардо Тревилья даваа гараг (2026.02.23)-т баруун Мексик рүү нэмэлт 2500 цэрэг илгээсэн бөгөөд ням гарагаас хойш нийтдээ ойролцоогоор 9500 цэрэг байршуулсан гэж засгийн газар мэдэгдсэн байна.
Мексикийн тусгай хүчнийхэн Халиско мужид хоригдож байхдаа нас барсан Немесио Осегера Сервантес буюу “Эль Менчо”-гийн үхлийн дараа тус улсын 20 орчим мужид эмх замбараагүй байдал үүсжээ. Халискогийн Шинэ Үеийн Картель (Jalisco New Generation Cartel, CJNG) нь Мексикийн хамгийн аймшигтай гэмт хэргийн байгууллагуудын нэг бөгөөд түүний удирдагч “Эль Менчо” нь улсын хэмжээнд хамгийн их эрэн сурвалжлагдаж байсан этгээд байв.
Хүчирхийлэл эхэлснээс хойш Халиско мужид Мексикийн Үндэсний Гвардын 25 гишүүн амиа алдсан гэж аюулгүй байдлын сайд мэдэгдэв. Батлан хамгаалахын сайд Тревильягийн хэлснээр, “Эль Менчо”-г уулзахаар төлөвлөж байсан, хайр дурлалын харилцаатай эмэгтэйг нь мөрдөн илрүүлсний үндсэн дээр баривчилжээ. Түүнийг баривчлах ажиллагааны үеэр бие хамгаалагчид болон баривчлах ажиллагаанд оролцсон цэргийн тусгай албаныхны хооронд буудалцаан болж, хар тамхины бүлэглэлийн толгойлогч хүнд шархадсан байна. Тэрээр Тапалпа хотоос нийслэл Мехико хот руу цэргийнхэн тээвэрлэж байх үед нас баржээ.
Ажиллагааны үеэр “Эль Менчо”-гийн хамгаалалтын албаны зургаан хүн амиа алдаж, Мексикийн цэргийн гурван албан хаагч шархадсан гэж Батлан хамгаалах яам мэдээлсэн байна. Аюулгүй байдлын нарийн бичгийн дарга Омар Гарсиа Харфучийн мэдээлснээр, “Эль Менчо”-гийн нас барснаас хойшхи эмх замбараагүй байдлын үеэр нэг шоронгийн харгалзагч, мужийн прокурорын газрын нэг ажилтан болон түүний гэмт хэргийн байгууллагын 30 гишүүн амиа алдсан гэж Франс Пресс (AFP) агентлаг мэдээлжээ.
Мексикийн Ерөнхийлөгч Клаудиа Шейнбаум “Эль Менчо”-гийн үхэлд хүргэсэн армийн ажиллагааг сайшааж, улс даяар энх тайван, аюулгүй байдлыг хангах нь өөрийн тэргүүлэх зорилт гэдгийг онцлов. “Тайван байдал бий. Засгийн газар байна. Зэвсэгт хүчин байна. Мөн маш сайн уялдаа холбоо байна” гэж Шейнбаум хэлжээ.
“Эль Менчо”-гийн үхлийн тухай мэдээ тархсаны дараа түүний картелийн гишүүд CJNG идэвхтэй үйл ажиллагаа явуулдаг олон хот, сууринд халдлага үйлджээ. Зарим хотод тэд зам дээр хадаас, өргөс цацан хааж, заримд нь автобус болон бусад тээврийн хэрэгслийг булаан авч замын голд шатаасан байна.
Шейнбаум замын хаалтуудыг цэвэрлэсэн гэж мэдэгдсэн. Гэвч картелийн гишүүд гал тавьсны улмаас олон арван банк, орон нутгийн бизнесүүд хохирол амсжээ. Олон хотод гудамж талбай эзгүйрч, орон нутгийн эрх баригчид иргэдийг гэртээ хоргодохыг уриалжээ.
Халиско мужийн нийслэл Гвадалахара хотоос хойд зүгт орших Сан Исидро хотод картелийн гишүүд болон Мексикийн Үндэсний Гвардын хооронд болсон мөргөлдөөний бичлэгүүдийг баталгаажуулсан байна.
Нэгэн рестораны хяналтын камерын бичлэгт орон нутгийн цагаар 11:00 (GMT 05:00)-ийн орчимд нэг автомашин Үндэсний Гвардын ачааны машиныг мөргөж, картелийн гишүүд түүн рүү гал нээж буй нь бичигджээ. Үндэсний Гвард энэ явдлын талаар дэлгэрэнгүй мэдээлэл хараахан гаргаагүй байна.
АНУ-ын Төрийн департамент “Эль Менчо”-г баривчлахад туслах баттай мэдээлэлд 15 сая ам.долларын шагнал амласан байв.
Мексикийн Батлан хамгаалах яамны мэдээлснээр, түүнийг баривчлах ажиллагааг Мексикийн арми гүйцэтгэж, Үндэсний Гвард болон Агаарын цэргийн хүчин дэмжлэг үзүүлсэн байна. Мөн АНУ-аас өгсөн “нэмэлт мэдээлэл” нь уг хар тамхины бүлэглэлийн толгойлогчийг барихад тусалсан ч түүнийг устгах ажиллагаанд АНУ-ын цэрэг оролцоогүйг Мексик баталсан гэж AFP мэдээлжээ.
