Өнөөдөр Монгол Улс тусгаар тогтнолоо дэлхийд зарласан түүхэн өдөр. Үндэсний эрх чөлөө, тусгаар тогтнолоо сэргээн мандуулсны 114 жилийн ойн энэ өдөр Монгол Улсын Төрийн дээд шагнал, одон медалийг гардууллаа.

Холимог тулааны дэлхийн аварга, мэргэжлийн сүмо бөхийн ёкозүна цолтон болон спортын зүтгэлтэн, сэтгүүлч, тайлбарлагч нар хөдөлмөрөө үнэллүүллээ.

Үндэсний эрх чөлөө, тусгаар тогтнолоо сэргээн мандуулсны 114 жилийн ойг тохиолдуулан Монгол Улсын Ерөнхийлөгч Ухнаагийн Хүрэлсүх зарлиг гаргаж нэр бүхий эрхмүүдэд төрийн дээд цол, одон, медаль хүртээлээ. Мэргэжлийн сүмо бөхийн 74 дэх Ёкозүна Хошорюү Сугаррагчаагийн Бямбасүрэнд Монгол Улсын гавьяат тамирчин цол хүртээлээ. Тэрээр 25 насандаа буюу энэ оны нэгдүгээр сард ёсокүна хэмээх сүмогийн хамгийн дээд цол болох аварга цолыг хүртсэн юм.

"Би ёкозүна цолыг сэвтээхгүйн тулд тууштай зүтгэх болно. Сүмогийн ертөнцөд хөл тавьснаас хойш энэ миний мөрөөдөл байсан. Энэ аз жаргалтай мэдрэмжийг илэрхийлэх үг алга. Би өөрийгөө улам дайчлах болно. Юу ч болсон хүчтэй байх болно" гэж байв. Түүний авга ах нь сүмо бөхийн 68 дахь их аварга Асашёорюү Д.Дагвадорж билээ.

Холимог тулааны "ONE Championship"-ийн аварга болсон тулаанч, дэлхийн аварга Б.Энх-Оргил өнөөдөр Монгол Улсын Ерөнхийлөгчийн зарлигаар гавьяат тамирчин боллоо. Энэ нь холимог тулааны спортоос төрж буй хоёр дахь гавьяат тамирчин юм.

Б.Энх-Оргилын багш Ж.Нарантунгалаг "One Championship" холбооны аваргын бүсийг эх орондоо анхлан авчирч байсан юм. Түүний амжилтыг 11 жилийн дараа шавь Б.Энх-Оргил давтсан. Холимог тулааны спортын төрлөөс багш, шавь хоёр гавьяат тамирчин болсон анхны тохиолдол боллоо. Б.Энх-Оргил мөн Нэтфликсийн "Physical: Asia" нэвтрүүлэгт дэд байр эзэлсэн Монгол Улсын багийн гишүүн билээ. 

Мөн өнөөдөр Монголын спортын сэтгүүлчдийн холбооны хүндэт ерөнхийлөгч, спортын нэрт зүтгэлтэн, ахмад сэтгүүлч Ч.Отгонбаатар Соёлын гавьяат зүтгэлтэн цолоор шагнагдлаа. Спортын зүтгэлтэн тэрээр энэ жил Монгол Улсаас анх удаа Азийн спортын сэтгүүлчдийн холбооны дээд шагнал болох “Азийн Спортын сэтгүүлчдийн холбооны алдартан” хэмээх нэр хүндтэй шагналыг хүртсэн юм.

Ч.Отгонбаатар нь дэлхийн спортын сэтгүүлчдийн холбооны конгресст Монгол Улсаа төлөөлөн 21 удаа, Азийн спортын сэтгүүлчдийн холбооны конгресст 14 удаа оролцсон. Тэрээр олимпын наадамд 12 удаа, өвөл, зуны Азийн наадамд нийт 13 удаа Монголын багийн төлөөлөгчөөр оролцсон туршлагатай.

Мөн спортын сэтгүүлч, тайлбарлагч Сосорбарамын Шижирбат, МҮОНРТ-ийн редактор Гарьдшувуугийн Отгонжаргал нарыг Хөдөлмөрийн гавьяаны улаан тугийн одонгоор шагналаа.