Техран АНУ-тай хэлэлцээ хийгээгүй гэж мэдэгдлээ. Энэ долоо хоногийн эхээр АНУ-ын Ерөнхийлөгч Дональд Трамп стратегийн чухал ач холбогдолтой Ормузын хоолой "тун удахгүй" дахин нээгдэнэ гэж мэдэгдсэн билээ. Ормузын хоолойтой холбоотой өрнөөд буй үйл явдлыг товчлон хүргэе.
Ормузын хоолойн хэлэлцээ: Персийн булангийн нэгэн өндөр албан тушаалтан Иран, Оман хоёр Ормузын хоолойн асуудлаар баасан гараг гэхэд тохиролцоонд хүрэх магадлал "50:50" гэж мэдэгдэв. Гэвч Ираны Гадаад хэргийн дэд сайд ийм тохиролцоо ойртсон байсан ч автоматаар усан замыг нээнэ гэсэн үг биш гэдгийг анхааруулжээ. Мөн Техран АНУ-тай ямар нэгэн хэлэлцээ хийж байгаа гэх мэдээллийг үгүйсгэж, Омантай хийж буй яриа хэлэлцээ нь зөвхөн хоёр талын шинжтэй гэж мэдэгдсэн байна.
Усан онгоц руу халдсан нь: Ираны дэмжлэгтэй Houthis хөдөлгөөн Адены буланд Саудын Арабын Daisy нэртэй газрын тос тээвэрлэгч хөлөг онгоцыг онилсон гэж мэдэгдэв. Тус бүлэглэл баллистик пуужингаар цохилт өгч, хөлгийг чиглэлээ өөрчилж буцахад хүргэсэн гэж мэдээлжээ.
Техраны өмнө тулгарч буй сорилтууд: Ираны Ерөнхийлөгч Масоуд Пезешкиан төрийн хэвлэлд өгсөн ярилцлагадаа улс орон нь хориг арга хэмжээ болон мөргөлдөөний улмаас өсөн нэмэгдэж буй дарамттай нүүр тулж байгаа бөгөөд өнөөгийн нөхцөл байдал нь 1979 оны Исламын хувьсгалаас хойших хамгийн хүнд үе болж байгааг онцолсон байна.
Израил Ливанд цохилтоо үргэлжлүүлэв: Үүний зэрэгцээ АНУ-ын зуучлалаар Израил, Ливаны хооронд өрнөж байсан хэлэлцээ лхагва гарагт төлөвлөснөөс эрт өндөрлөсөн бөгөөд энэ үеэр Израил Ливаны өмнөд хэсэгт дахин цохилт өгсөн байна.
