УИХ-ын цахим хуудаст хуулийн төсөлд шинжилгээ хийх хиймэл оюуны цэс ажиллаж эхэлсэн. УИХ-ын гишүүд, Засгийн газраас хууль, тогтоолын төслийг өргөн мэдүүлэхдээ тухайн төсөлд хүний эрх, эрх чөлөө, эдийн засгийн эрх чөлөөг зөрчиж буй зохицуулалт туссан эсэхийг, Үндсэн хуультай зөрчилдөж буй эсэхийг хиймэл оюунаар шинжлүүлэх боломж бүрдсэн юм.
УИХ-ын дарга Н.Учрал "Цаашдаа Үндсэн хуультай зөрчилдөж буй, Үндсэн хууль дахь хүний эрх, эрх чөлөөтэй холбоотой заалтуудыг зөрчсөн аливаа төслийг хүлээж авахгүй байх зарчмыг баримтална. Тиймээс төсөл өргөн мэдүүлэгчид УИХ-ын цахим систем дэх “AI” буюу хиймэл оюунаар шинжилгээ хийлгэж хэвших хэрэгтэй" гэсэн юм.
Хиймэл оюунаар боловсруулсан хуулийн төслүүдээс гадна одоо хүчин төгөлдөр мөрдөгдөж буй хуулиудад дүн шинжилгээ хийх боломжтой. Хүчин төгөлдөр мөрдөгдөж буй 378 хуульд хиймэл оюунд суурилсан дүн шинжилгээ хийхэд иргэний эдийн засгийн эрх чөлөөг шууд зөрчсөн 110 хууль байгаа нь тогтоогджээ. Мөн иргэдэд хүндрэл үүсгэдэг 228 хууль байгааг тогтоосон байна.
