Ерөнхий сайд Г.Занданшатар Дорнын эдийн засгийн 10 дугаар чуулга уулзалтад оролцохоор ОХУ-ын Владивосток хотод хүрэлцэн ирлээ. Ерөнхий сайд Г.Занданшатарыг Владивосток хотын “Кневичи” олон улсын нисэх буудалд Монгол Улсаас ОХУ-д суугаа Элчин сайд Ө.Энхтүвшин, ОХУ-ын Приморийн хязгаарын Засгийн газрын орлогч дарга К.В.Хижинский, Приморийн хязгаарын Гадаад харилцаа, хамтын ажиллагааны сайд К.Г.Сидоренко нарын албаны хүмүүс угтан авлаа.

Ерөнхий сайд Г.Занданшатар “Алс Дорнодын гудамж” үзэсгэлэнгийн талбайд саатаж, ОХУ-ын Бүгд найрамдах Буриад улс болон ОХУ-ын Бүгд найрамдах Якут улсын үзэсгэлэнгийн танхимуудаар зочиллоо. Энэ үеэр ОХУ-ын Бүгд найрамдах Буриад улсын тэргүүн А.С.Цыденов, ОХУ-ын Бүгд найрамдах Якут улсын тэргүүн А.С.Николаев нар байлцлаа.

Ерөнхий сайд Г.Занданшатар маргааш Дорнын эдийн засгийн аравдугаар чуулга уулзалтын өргөтгөсөн хуралдаанд оролцоно.