Гал зогсоох хугацаа дуусахад ганцхан хоног үлдээд байгаа энэ үед дайныг зогсоох дипломат оролдлогууд тодорхойгүй хэвээр байна. АНУ хэлэлцээ хийхээр Исламабад хот руу төлөөлөгчдөө илгээх боловч зөвхөн Иран оролцохоо баталгаажуулсан тохиолдолд явахаа мэдэгдсэн.

Ираны парламентын дарга Мохаммад Багхер Галибаф “дарамт, сүрдүүлгийн сүүдэр дор хэлэлцээ хийхийг хүлээн зөвшөөрөхгүй. Тулааны талбарт шинэ хөзрүүдээ дэлгэхэд бэлэн” гэж мэдэгдэв.

Харин АНУ-ын Ерөнхийлөгч Доналд Трамп тохиролцоогоо “харьцангуй хурдан” хийхээр зүтгэж, Ираны боомтуудад тавьсан тэнгисийн бүслэлт гэрээ байгуулагдах хүртэл үргэлжилнэ хэмээн сүрдүүлсэн юм.

АНУ-ын Төрийн департамент Израил, Ливан улсууд пүрэв гарагт Вашингтон хотод хоёр дахь шатны хэлэлцээ хийнэ гэдгийг баталгаажууллаа.

Израил өмнөд Ливанд агаараас цохилт өгсөөр байна. Сүүлийн цагуудад Каакаайет эль Жиср хотод хийсэн агаарын довтолгоонд зургаан хүн шархадсан бөгөөд Киам хотод орон сууцуудыг нураасан нь 10 хоногийн гал зогсоох хэлэлцээрийг зөрчсөн үйлдэл боллоо.

Ираны Гадаад хэргийн сайд Аббас Аракчи АНУ гал зогсоох хэлэлцээрийг “үргэлжлүүлэн зөрчиж байгаа” нь дипломат үйл явцыг үргэлжлүүлэхэд гол саад болж байна гэж мэдэгдэв.

Аббас Аракчи Пакистаны Гадаад хэргийн сайд Ишак Дартай утсаар ярилцахдаа Иран асуудлын бүх талыг харгалзан үзэж байгаа ч цаашид хэрхэн үргэлжлүүлэхээ хараахан шийдээгүй байгааг хэлсэн байна.

Мянга мянган хүний аминд хүрч, ялангуяа эрчим хүчний зах зээлийг донсолгосон энэхүү мөргөлдөөнд хэрэгжиж буй хоёр долоо хоногийн гал зогсоох хугацаа энэ долоо хоногт дуусна.