Ерөнхийлөгчийн Тамгын газраас санаачлан Монгол Улсын Их Сургуулийн Философи, шашин судлалын тэнхим, Шинжлэх Ухааны Академийн Философийн хүрээлэнтэй хамтран 2026 оны 5 дугаар сарын 22-ны өдөр “Ус хамгаалах соёл, уламжлал” сэдэвт эрдэм шинжилгээний хурлыг зохион байгууллаа.

Хуралд Монгол оронд явагдаж буй уур амьсгалын өнөөгийн өөрчлөлт, Хөвсгөл нуурын экосистемийн өнөөгийн төлөв байдал, уур амьсгалын өөрчлөлтийн нөлөө, Ус амин оршихуй болох нь: Монголчуудын усны тухай ойлголт, Монголчуудын уламжлалт шашин шүтлэг дэх лусын тухай ойлголтыг тодруулах нь, Усны доорх соёлын өвийн хадгалалт хамгаалалт ба сэргээн засварлалтын асуудал тэргүүтэй сэдвээр 15 илтгэгч 11 илтгэлээ хэлэлцүүлэв.

Эх дэлхий, элгэн нутгаа унаган төрхөөр нь хадгалах, экосистемийг нь хадгалан хамгаалахад монголчуудын уул хайрхан, усны шүтлэг, тахилга нь тодорхой үр дүнтэй болохыг хуралд оролцогчид онцолж, Монгол Улсын Ерөнхийлөгч Хөвсгөл нуурыг төрийн тахилгатай болгосныг дэмжиж буйгаа илэрхийллээ.