Агуйн гүнд гацсан долоон хүний тавыг нь аварсан боловч үлдсэн хоёр хүнийг хайх ажиллагаанд үргэлжилсэн их бороо ноцтой хүндрэл учруулж байна.
Олон улсын аврах багийнхны дунд хамгийн түрүүнд газар дээр нь очсон Финландын шумбагч Микко Пааси борооны ус агуйн хоёр дахь танхим хүртэл дүүрсэн тул насосоор усыг мэдэгдэхүйц хэмжээгээр шавхах хүртэл шумбагчид дотогш нэвтрэх боломжгүй болсон гэж мэдээлжээ.
Ойролцоох тосгоны долоон оршин суугч өнгөрсөн долоо хоногт ашигт малтмал хайхаар агуйд орсон боловч гэнэтийн үерийн улмаас гарц нь хаагдсан байна. Харин нэг хүн үер болохоос өмнө амжиж гарч ирэн эрх баригчдад мэдэгдэж чаджээ.
Лаос болон хөрш Тайланд улсын аврах багууд нийслэл Виентиан хотоос хойд зүгт 120 км орчим зайд орших Кайсомбоун мужийн уулархаг бүсэд долоо хоногийн турш хамтран ажиллаж байна.
Мөн аврах ажиллагаанд Финланд, Малайз, Япон, Индонези, Франц, Австрали улсаас ирсэн туршлагатай шумбагчид оролцож байгаа юм.
Аврагчдын зарим нь 2018 онд Тайландын хойд хэсэгт болсон агуйн аврах ажиллагаанд оролцож байсан аж. Тухайн үед 12 сурагч болон тэдний хөлбөмбөгийн дасгалжуулагчийг үерт автсан агуйгаас амжилттай гаргаж байсан юм.
Аврагдсан таван хүн одоогоор орон нутгийн эмнэлэгт эмчилгээ хийлгэж байгаа бөгөөд биеийн байдал нь сайн байгаа талаар Малайзын шумбагч Лий Киан Лие мэдэгджээ.
Тэрээр “Бид тэдэнтэй агуйн гүн хэсэг ямар харагддаг талаар асууж ярилцсан. Бидэнд байгаа мэдээлэлд үндэслэн хайлтаа үргэлжлүүлнэ. Магадгүй үлдсэн хоёр хүнд хүрч чадна гэж найдаж байна” хэмээн мэдэгдсэн байна.
Аврагчид одоогоор агуйн дотор 200 гаруй метр нэвтэрч, нийт таван өөр танхим илрүүлжээ. Аврагдсан таван хүн тав дахь танхимаас олдсон байна.
Микко Паасигийн мэдээлснээр амьд үлдсэн хүмүүс тав дахь танхимд нарийн ан цав байгааг хэлсэн бөгөөд энэ нь агуйн илүү гүн хэсэг рүү хүрэх гарц байж болзошгүй аж.
Тэрээр видео ярилцлагын үеэр “Нэг онол гарч ирсэн. Тэр жижиг ан цавын цаана агуй үргэлжилж, зургаа дахь танхим байж магадгүй. Хэрэв бид тэр нарийн хэсгийг нэвтэлж чадвал зургаа дахь танхимд хүрч, тэнд юу байгааг харах боломжтой болно. Энэ нь бидэнд найдвар төрүүлж байна” гэж хэлжээ.
Аврагдсан таван хүнийг Кхамла, Муэд, Ее, Инг, Лаен гэсэн нэрээр нь танилцуулжээ. Тэднийг лхагва гарагт олсон.
Эхний хүнийг баасан гарагт туршлагатай шумбагчийн удирдлага дор усанд автсан нарийн хонгилоор дамжуулан аюулгүй гаргажээ. Үлдсэн дөрвөн хүн усны түвшин хангалттай буурсны дараа бямба гарагт өөрсдөө алхаж агуйгаас гарсан гэж аврагчид мэдээлсэн байна.
