Хүүхдүүд нийт хүн амын 10.8 хувийг эзэлж байгаа нь бүртгэл хийж эхэлснээс хойш хамгийн бага хувь болжээ.

Японы хүн амд хүүхдийн эзлэх хувь түүхэн доод хэмжээнд хүрч, олон жилийн турш төрөлт буурч байгаа нь тус улсын хүн ам зүйн хямралыг улам гүнзгийрүүлж байна. Дотоод хэрэг, харилцаа холбооны яамнаас даваа гарагт танилцуулсан тоо баримтаар, 2026 оны дөрөвдүгээр сарын 1-ний байдлаар 15 хүртэлх насны хүүхдийн тоо 13.29 сая болж, өмнөх оноос 350 мянгаар буурсан байна.

Энэ нь 1950 онд хойш бүртгэл эхэлснээс хойших хамгийн бага үзүүлэлт бөгөөд хүүхдийн тоо 45 дахь жилдээ дараалан буурч буйг илтгэж байна.

Одоогоор хүүхдүүд нийт хүн амын 10.8 хувийг эзэлж байгаа нь мөн түүхэн дэх хамгийн бага хувь юм.

Гадаадын оршин суугчдыг хамруулсан уг тооцоолол нь хүн амын тооллоготой холбогдсон өгөгдөлд тулгуурласан байна. Энэхүү мэдээллийг мягмар гарагт тохиосон Хүүхдийн өдрийн өмнө нийтэлжээ.

Засгийн газар 2030 он хүртэлх хугацааг “энэ чиг хандлагыг эргүүлэх эцсийн боломж” хэмээн тодорхойлсон ч хүүхэд өсгөж буй өрхүүдийн санхүүгийн дэмжлэгийг нэмэгдүүлэх зэрэг арга хэмжээ одоогоор үр дүн төдийлөн өгөөгүй байна.

Хүйсийн хувьд 6.81 сая хүү, 6.48 сая охин байна.

Насны бүлгээр авч үзвэл 12–14 насныхан 3.09 сая байгаа бол 0–2 насныхан 2.13 сая байна.

Японы Эрүүл мэндийн яамны урьдчилсан мэдээллээр, 2025 онд төрөлтийн тоо 705 809 болж буурсан нь түүхэн доод түвшин бөгөөд 10 дахь жилдээ дараалан буурчээ.

Японы хүүхдийн хүн ам 1954 онд 29.89 саяд хүрч оргилдоо хүрсэн бол 1982 оноос буурч эхэлжээ. Нийт хүн амд эзлэх хүүхдийн хувь 1975 оноос хойш 52 жил дараалан буурч байна.

Нэгдсэн Үндэстний Байгууллагын судалгаагаар 40 саяас дээш хүн амтай орнуудын дунд Япон нь хүүхдийн эзлэх хувиар хоёрдугаарт бага бөгөөд 10.2 хувьтай БНСУ хамгийн бага үзүүлэлттэй гарчээ.

Өнгөрсөн оны хоёрдугаар сард Японд шинээр төрсөн хүүхдийн тоо 125 жилийн түүхэн дэх хамгийн бага хэмжээнд хүрч, ес дэх жилдээ дараалан буурсан талаар мэдээлж байсан бөгөөд засгийн газрын авч хэрэгжүүлсэн арга хэмжээнүүд дорвитой өөрчлөлт авчирч чадаагүй байна.

2024 онд Японд 720 988 хүүхэд төрсөн нь өмнөх оноос 5 хувиар буурсан үзүүлэлт гэж тухайн үед Эрүүл мэндийн яам мэдээлж байв.

Өнгөрсөн нэгдүгээр сард хүн ам зүй, хөгшрөлтийн асуудлаар мэргэшсэн нэгэн шинжээч анхааруулахдаа, хэрэв төрөлтийн бууралт одоогийн чиг хандлагаараа үргэлжилбэл 2720 оны нэгдүгээр сарын 5 гэхэд Японд 14-өөс доош насны ганцхан хүүхэд үлдэх эрсдэлтэй гэжээ.