Засгийн газрын ээлжит хуралдаанаас гарсан шийдвэрийн талаар Гэр бүл, хөдөлмөр, нийгмийн хамгааллын сайд Т.Аубакир мэдээлэл хийлээ.
Тэрээр "Гэр бүлийн хөгжлийг дэмжих тухай хууль болон Халамжийг дэмжих тухай хуулийн төслийг УИХ-д өргөн барихад бэлдэж байна. Гэр бүлийн тухай хууль нь 990 гаруй мянган гэр бүл рүү чиглэсэн хууль. Гэр бүр цуцлалт жил бүр нэмэгдэж, мөн төрөлт багасан Монгол Улсын хүн ам жилдээ 40 мянга орчмоор л нэмэгдэж байна. Иймээс гэр бүлийг дэмжих бодлого баримтлах шаардлага тулгарч байна. Энэ нь ганц манай улсын асуудал биш бөгөөд олон улс оронд ийм сорилт тулгарч байгаа.
Хүүхдэд олгодог 100 мянган төгрөгийг халамж гэж яриад байдаг. Гэтэл энэ чинь төрөөс хүүхдийн хөгжлийг дэмжих бодлогын хүрээнд өгч буй мөнгө. Монгол Улс хүн ам зүйн бодлоготой, гэр бүлийг дэмжих эрх зүйн орчин бүрдэж байна гэсэн үг.
Халамжийн төрлийн мөнгө нь амьжиргаа өндөр гэр бүл рүү чиглэж байгаа судалгааны дүн гарсан. Тэгэхээр Халамжийн тухай хуулиар асаргааны зардлыг ч гэсэн тооцож өгдөг байх ёстой юм байна. Уг хоёр хуулиар халамжийн асуудал илүү ойлгомжтой болж байгаа" гэв.
