Ираны Исламын хувьсгалт гвард Йорданы Акаба нисэх онгоцны буудал дахь АНУ-ын агаарын хөлгүүдэд баллистик пуужингаар цохилт өгсөн гэж мэдэгдлээ.
Мөн даваа гарагт Ормузын хоолойн өмнөд хэсгээр транзит хийхийг оролдсон газрын тосны хоёр танкер дэлбэрч, жагсаалаас гарсан тухай мэдээлэхдээ уг хөлөг онгоцнуудыг АНУ-ын цэргийнхний зөвлөсний дагуу тус замаар зорчсон хэмээн буруутгажээ. Гэхдээ эдгээр хөлөг онгоцнуудын нэр, далбаа, экипажийн бүрэлдэхүүн болон хохирлын талаар тодорхой мэдээлэл өгөөгүй байна.
Ираны цэргийнхэн тус бүс нутагт АНУ-ын түрэмгийлэл үргэлжилж буй цагт Ормузын хоолой аюултай хэвээр байх болно хэмээн анхааруулаад "Энэхүү усан зам нь нефтийн бүтээгдэхүүн байтугай, ганц дусал газрын тос, хий нэвтрэхэд ч аюултай байх болно" гэж мэдэгдсэн байна.
Түүнчлэн тэд АНУ-ын зэвсэгт хүчнийг "шийтгэх ажиллагаа"-нд бэлтгэлтэй байхыг сануулжээ.
Ойрхи Дорнодод өрнөж буй мөргөлдөөн болон Ормузын хоолойд хөлөг онгоц шатсан тухай мэдээллээс үүдэн Азийн түүхий эдийн бирж дээр газрын тосны үнэ эрс өслөө. Тухайлбал, дэлхийн жишиг Брент хольцын фьючерс үнэ 2.72%-иар өсөж, баррель нь 90.50 ам.долларт хүрсэн бөгөөд арилжааны үеэр 91 ам.доллар давжээ.
Харин АНУ-ын Төв командлал (CENTCOM) Ираны цэргийн байршлуудад 9 дэх шөнөө дараалан агаараас амжилттай цохилт өгснөө мэдээлэв. Хариу цохилтоор Ираны цэргийн командлалын төвүүд, агаарын довтолгооноос хамгаалах ангиуд, пуужин болон дрон харвах төхөөрөмж, мэдээлэл холбооны сүлжээг минийн аюулаас цэвэрлэж, довтлох чадварыг бууруулах зорилгоор устгасан байна.
Сүүлийн өдрүүдэд Йордан болон Иракт болсон халдлага, дэлбэрэлтийн улмаас АНУ-ын 3 цэрэг амь үрэгдээд байгаа юм. Одоогоор мөргөлдөөн эхэлснээс хойш АНУ-ын тал цэргийн 17 алба хаагчийн амь нас хохирсныг баталгаажуулсан бол Ираны Эрүүл мэндийн яам агаарын цохилтын улмаас тус улсад 50 хүн амь үрэгдэж, 500 гаруй хүн бэртэж гэмтсэн гэж мэдээлжээ.
