НИТХ-ын ээлжит бус хуралдаанаар өчигдөр иргэдийн хурлын дарга А.Баярыг огцруулсан тухай мэдээлсэн. Тэгвэл НИТХ-ын төлөөлөгч А.Баяр дээрх шийдвэрийг хууль бус гэж үзэж буйгаа мэдэгдлээ.
Тэрээр "Туулын хурдны зам төслийг НИТХ-аар хэлэлцэж, дэмжсэн тогтоол гарга гэсэн шахалт надад ирсэн. Иргэд Туулын хурдны зам төслийн байгальд нөлөөлөх эсэх талаар тодорхой мэдээлэлгүй байгаа нөхцөлд экологийн байдлыг үнэлсний дараа төслийг эхлүүлэх тухай Засгийн газрын тогтоол гарчихаад байхад НИТХ энэ төслийг явуул гэж болохгүй шүү дээ. Хууль зөрчсөн үйлдэл болно. НИТХ бол иргэдийнхээ мэдэх эрхийг хангахын төлөө ажиллана. Иргэдийнхээ талд байгаа учраас би НИТХ-ыг хуралдуулахгүй байх шийдвэр гаргасан. Хурлын дарга зарлаагүй тохиолдолд хуралдаан болох эрх зүйн үндэслэл, орчин байхгүй. Тиймээс НИТХ-ын ээлжит бус хуралдаан хүчин төгөлдөр бус.
13.2 тэрбумыг хэвлэлд шилжүүлсэн гэж намайг гүтгэлээ. Өнөөдрийн байдлаар НИТХ-аас 10.2 тэрбум төгрөг шүүх болон нийслэлийн прокурор, цагдаа, онцгой байдал зэрэг 33 байгууллага руу гаргасан. Үүний дүнд гэмт хэргийн гаралт тодорхой хэмжээнд буурсан. НИТХ-ын төсвийн зарцуулалт шилэн дансанд нээлттэй бий. Харин НЗДТГ-ын шилэн данс хаалттай байгаа шүү.
Би хурлын даргынхаа бүрэн эрхийн хүрээнд Улаанбаатар хотод хэрэгжүүлэх мега төслийн санхүүжилт, шалгарсан компаниудын мэдээллийг иргэдэд нээлттэй болгох ажлын хэсэг байгууллаа. Ажлын хэсэгт аль аль намын бүлгээс төлөөлөгч оруулна. Дан ганц Туулын төсөл бус нийслэлд хэрэгжүүлж байгаа бүх мега төсөл яг мега төсөл үү, эсвэл мега хулгай юу гэдгийг тогтооно.
Иргэдийнхээ эсрэг жагсдаг хотын дарга Х.Нямбаатарыг чөлөөлж байж Улаанбаатарын хотын хөгжлийн түүчээ ирнэ. Тэр болтол иргэдтэйгээ хамтарч нэг талд гартал зүтгэнэ" гэв.
