Умард Солонгосын Гадаад хэргийн сайд Чой Сон-хуй Сингапурын Гадаад хэргийн сайд Вивиан Валакришнантай Пёньян хотноо хэлэлцээ хийсэн талаар төрийн мэдлийн хэвлэлүүд мэдээлэв. Энэ нь сүүлийн найман жилийн хугацаанд Сингапурын Гадаад хэргийн сайдын Умард Солонгост хийж буй анхны айлчлал болж байна.
Мягмар гарагт болсон уулзалтын үеэр хоёр тал хоёр улсын харилцааг бэхжүүлэх, “олон салбар дахь” хамтын ажиллагааг гүнзгийрүүлэх арга замын талаар, мөн “бүс нутгийн болон олон улсын асуудлууд”-ын талаар хэлэлцсэн гэж KCNA мэдээлжээ.
Вивиан Валакришнан даваа гарагт Пёньяны Олон улсын нисэх буудалд хүрэлцэн ирэхэд Умард Солонгосын Гадаад хэргийн дэд сайд Пак Сан-гил болон тус улсын Сингапур дахь Элчин сайд Ро Кил-сон нар угтан авчээ.
Мөн Умард Солонгосын Гадаад хэргийн яам Сингапурын төлөөлөгчдөд зориулан хүндэтгэлийн зоог барьсан гэж мэдээлэлд дурдсан байна.
Вивиан Валакришнаны Пёньян дахь айлчлал нь түүний ням гарагаас пүрэв гараг хүртэл үргэлжлэх Зүүн Хойд Азийн тав хоногийн айлчлалын нэг хэсэг бөгөөд энэ хүрээнд тэрээр БНХАУ, БНСУ-д мөн айлчлах юм.
Сингапур нь Умард Солонгостой харьцангуй найрсаг харилцаатай улс гэж тооцогддог. Тухайлбал, 2018 онд АНУ-ын Ерөнхийлөгч Дональд Трамп, Умард Солонгосын удирдагч Ким Жон-ун нарын түүхэн анхны дээд хэмжээний уулзалтыг Сингапур зохион байгуулж байсан билээ.
Сингапурын Умард Солонгостой байсан өмнөх харилцаа болон Вивиан Валакришнан Сөүл руу явахынхаа өмнө Пёньянд айлчилж буйг харгалзан үзвэл, түүний Чой Сон-хуйтай хийсэн уулзалт нь Өмнөд болон Умард Солонгосын яриа хэлэлцээнд оролцох сонирхлын талаар шууд бус мэдээлэл өгөх боломжтой гэж ажиглагчид үзэж байна.
Вивиан Валакришнан пүрэв гарагт Сөүл хотод хүрэлцэн очих хуваарьтай.
