Монголын морин спорт уяачдын холбооны 30 жил, "Их хурд-10" шигшмэл хурдан морьдын уралдаан, Монголын уяачдын өдөрт зориулсан баяр наадам өнөөдөр Хүй долоо худагт эхэллээ. Өнөөдрөөс эхлэн ням гараг хүртэл үргэлжлэх наадмын үеэр цагдаа, дотоодын цэргийн байгууллагын алба хаагчдийн бүрэлдэхүүн баг ажиллаж байна. Наадмын үеийн нийтийн хэв журам хамгаалах, олон нийтийн болон замын хөдөлгөөний аюулгүй байдлыг хангах чиглэлээр 14 анги байгууллагын 540 алба хаагч үүрэг гүйцэтгэн ажиллаж, иргэдэд байнгын зөвлөгөөг өгч байна.
Монголын уяачдын өдөрт зориулсан баяр наадмын үеэр хурдан морины уралдаан, бөхийн барилдаан, сурын харваа өнөөдөр эхэлсэн. Наадмын эхний өдөр буюу өнөөдөр азарга, соёолон, хязаалан насны морьдыг уралдаан боллоо. Маргааш буюу наймдугаар сарын 9-д их нас, шүдлэн, сонгомол дээд насны уралдаантай. Харин наадмын сүүлийн өдөр буюу наймдугаар сарын 10-д даага, сонгомол дунд, бага насны морьдын уралдаан болно. Мөн хүчит 256 бөхийн барилдаан өнөөдөр эхэллээ.