Сөүл хотын давж заалдах шатны шүүх Америкийн YouTube стример Жонни Сомалид оноосон 6 сарын хорих ялыг хэвээр үлдээж, прокурор болон шүүгдэгчийн аль алиных нь давж заалдах хүсэлтийг хэрэгсэхгүй болголоо.

Сөүл хотын Баруун бүсийн шүүхийн Эрүүгийн хэргийн давж заалдах шатны 1-р хэлтэс Рамси Халид Исмаилд оноосон 6 сарын хорих ял, 20 хоногийн саатуулах шийтгэлийг хэвээр үлдээсэн байна. Гэхдээ гэмт хэрэг үйлдэхдээ ашигласан гар утсыг хураах тухай өмнөх шийдвэрийг хууль зүйн үндэслэл хангалтгүй гэж үзэн хүчингүй болгожээ.

Сомалид:

• бизнесийн үйл ажиллагаанд саад учруулсан,
• бэлгийн шинжтэй deepfake дүрс бичлэг бүтээж, тараасан,
• "Бэлгийн гэмт хэргийг шийтгэх тусгай хуулийг зөрчсөн гэсэн үндсэн ял тулгасан юм.

Тэрээр Японы дайны үеийн бэлгийн боолчлолын хохирогчдод зориулсан дурсгал болох Энхтайвны хөшөөг үнссэн бичлэгээ нийтэлсний дараа Өмнөд Солонгосын иргэдийн эсэргүүцэлтэй тулгарсан. 

Албан ёсны яллах дүгнэлтэд 2024 оны аравдугаар сард Сөүлийн Мапо дүүрэг дэх нэгэн дэлгүүрт хөгжим чанга тоглуулж, гоймонгийн шөлийг ширээн дээр асгасан, худалдааны үйл ажиллагааг тасалдуулсан хэрэг багтжээ.

Мөн тэрээр автобус, метроны зорчигчдод удаа дараа түвэг учруулсан, гудамжинд явж байсан хүмүүс рүү эвгүй үнэртэй зүйл ойртуулсан гэж буруутгагдсан байна.

Прокурорууд түүнчлэн эрэгтэй, эмэгтэй хүмүүсийн царайг нэгтгэн, зөвшөөрөлгүй бэлгийн шинжтэй deepfake дүрс бичлэг бүтээж, тараасан гэх нэмэлт ял төлөвлөжээ.

Анхан шатны шүүх өнгөрсөн дөрөвдүгээр сард түүнд:

• 6 сарын хорих ял,
• 20 хоногийн саатуулах шийтгэл,
• 5 жилийн хугацаанд хүүхэд болон хөгжлийн бэрхшээлтэй иргэдтэй холбоотой ажил эрхлэхийг хориглох шийтгэл оногдуулсан юм.

Шүүгч шийдвэрээ танилцуулахдаа "Шүүгдэгч санамсаргүй сонгосон хохирогчдын эсрэг удаа дараа гэмт хэрэг үйлдэж, түүнийгээ олон нийтэд шууд дамжуулан цацсан нь хууль дээдлэх зарчмыг үл тоомсорлосон ноцтой хандлагыг харуулж байна" гэдгийг онцолжээ. Тэр үед Сомалиг шүүх танхимаас шууд цагдан хорьсон байна.

Зургаадугаар сарын 11-ний давж заалдах шатны сонсголын үеэр түүний өмгөөлөгч Сомали бүх хэргээ хүлээн зөвшөөрсөн, хийсэн бүх үйлдэлдээ харамсаж байгаа, АНУ-д байхдаа хоёр туйлт сэтгэцийн эмгэгийн оноштой байсан бөгөөд эмчилгээ хийлгэдэг байсан ч Өмнөд Солонгост ирснээс хойш эмээ хэрэглэж чадаагүй гэж мэдэгдэн ялыг нь хөнгөрүүлэхийг хүссэн юм.

Гэвч давж заалдах шатны шүүх эдгээр үндэслэлийг хангалтгүй гэж үзэж, анхан шатны шүүхийн хорих ялыг бүхэлд нь хэвээр үлдээжээ.