Мөнгөний бодлогын хорооны ээлжит хурлаас банкны заавал байлгах нөөц тооцох эх үүсвэрт өөрчлөлт оруулах шийдвэр гаргажээ.

Монголбанкны дэд ерөнхийлөгч Г.Энхтайван "Макро зохистой бодлогын хүрээнд банкны гадаад зах зээлээс 2026 оны аравдугаар сарын 1-нээс хойш шинээр татах 360 хоногоос 3 жил хүртэлх хугацаатай гадаад валютын бонд болон зээлийн эх үүсвэрийн 25 хувьтай тэнцэх дүнг заавал байлгах нөөцөд тооцох эх үүсвэрт хамруулах шийдвэр гаргалаа.

Дэлхийн эдийн засгийн төлөв тодорхой бус байгаа энэ үед гадаад санхүүжилтийн зардал, хүртээмж богино хугацаанд өөрчлөгдөх, улмаар хөрөнгийн урсгалд нөлөөлөх эрсдэлтэй байна. Сүүлийн жилүүдэд банкны салбарын нийт эх үүсвэрт гадаад санхүүжилтийн эзлэх хувь өсөж, зээлийн санхүүжилтийг гадаад эх үүсвэрээр нэмэгдүүлэх хандлага ажиглагдаж байгаа нь санхүүжилтийн бүтцийн гадаад хамаарлыг нэмэгдүүлж байна.

Иймд гадаад эх үүсвэрийн бүтцийг илүү урт хугацаатай, тогтвортой чиглэлд шилжүүлэх, мөн валютын болон хугацааны зөрүүг бууруулах зорилгоор дээрх эх үүсвэрийг гадаад валютын заавал байлгах нөөцийн шаардлагад үе шаттайгаар хамруулах шийдвэр гаргасан. Энэ нь богино болон дунд хугацаатай гадаад санхүүжилтийн сэдлийг бууруулж, урт хугацаат эх үүсвэрийг дэмжихэд чиглэсэн бодлогын арга хэмжээ юм” гэв.

Мөнгөний бодлогын хорооны шийдвэрийг 14 хоногийн дараа Монголбанкны цахим хуудсанд нийтлэх юм.