Дархан-Уул аймгийн Орхон сумын хоёрдугаар багийн нутаг дэвсгэр Хөтөл хорооллын хоёр малчин өрхөд шүлхий өвчний сэжигтэй тохиолдол бүртгэгдсэн талаар бид мэдээлсэн. Нийт хэчнээн мал өвчилсөн талаар болоод хариу ямар арга хэмжээ авч байгаа талаар Орхон сумын засаг дарга Б.Түмэнцогтоос тодрууллаа.
Тэрээр энэ талаар "Дархан-Уул аймгийн Орхон сумын хоёрдугаар багийн нутагт зургаадугаар сарын 14-нд О хэвшлийн шүлхий өвчний тохиолдол бүртгэгдсэн. Үүнтэй холбогдуулан аймгийн Мал эмнэлгийн газар болон холбогдох байгууллагууд халдвар илэрсэн голомтод хорио цээрийн дэглэм тогтоон ажиллаж байна. Одоогийн байдлаар хоёр өрхийн зургаан хонь өвчилснөөс гурван нь бүрэн эдгэрээд байна. Мөн өвчний тархалт маш бага байгаа бөгөөд халдварыг хумих, цаашид тархахаас урьдчилан сэргийлэх чиглэлээр хяналт, тандалт, ариутгал халдваргүйтгэлийн арга хэмжээг эрчимжүүлэн хэрэгжүүлж байгаа" гэв.
А.Цагааншүхэрт
