Чуулганы нэгдсэн хуралдаанаар Ерөнхийлөгчийн өргөн мэдүүлсэн УИХ-ын тухай хуульд нэмэлт, өөрчлөлт оруулах тухай хуулийн төслийг хэлэлцлээ. Уг хуулийн төсөл нь УИХ-ын гишүүнийг эгүүлэн татах агуулгатай юм.
УИХ-ын гишүүн Б.Жаргалан: -Энэ бол цаашид парламент цаашаа орших уу, эс орших уу гэдэг зангилаан дээр оршиж байгаа хуулийн төсөл. Хүн болгон хийх ёстой ажлаа хариуцлагатайгаар хийх хэрэгтэй байна. Ерөнхийлөгч нь Ерөнхийлөгч шиг байж эв нэгдлийг хангадаг, Засгийн газар нь Засгийн газар шиг асуудлаа шийддэг, УИХ нь УИХ шиг байх ёстой. Тэр нь юу гэхээр ардчилсан тогтолцоо, парламентийн дархлааг хамгаалах, хууль тогтоох эрх мэдлийнхээ хүрээнд иргэдийнхээ аж амьдралд шаардлагатай хуулиудыг батлах. Гэтэл манайд өнөөдөр бүх зүйл хөлөөрөө толгой хийж байна гэдэг шиг болоод байна. Яг хийх ёстой ажлаа бүрэн дүүрэн хийж байгаа хүн алга. ҮАБЗ-ийн нарийн бичгийн дарга нь хүртэл УИХ-д орж ирээд хууль тайлбарлаад сууж байна. Хуулиа батлуулж авчихаад УИХ-ын гишүүдэд ёс зүй заагаад суух юм байна.
ҮАБЗ-ийн нарийн бичгийн дарга А.Бямбажаргал: -ҮАБЗ-ийн хуулиар миний хүлээсэн үүрэг бол гишүүдийнхээ бүрэн эрх, чиг үүргийг хэрэгжүүлэхэд туслахаар заасан. Хоёрдугаарт, намайг ажлын хэсгийн гишүүнээр оруулсан. Би энэ үүрэгт ажлаа хийж байгаа. Би Б.Жаргалан гишүүнд МУИС-д Үндсэн хуулийн процессийн эрх зүй хичээл заасан. Заахдаа би ёс зүйн том алдаа гаргаснаа энд хүлээн зөвшөөрөх ёстой юм байна гэж бодлоо. Тэр нь юу вэ гэхээр Б.Жаргалан гишүүн хичээлдээ суугаагүй хүнээр дүнгээ гуйлгаж тавиулсан юм. Би үүндээ ёс зүйн болон бусад хариуцлага хүлээхэд бэлэн байна.
УИХ-ын дарга С.Бямбацогт: -Ийм асуудал ярихгүй шүү. Хэлэлцэж байгаа асуудалтай холбоотой асуудал ярина. Ажлын хэсгийн гишүүд хэлж байгаа үгээ бодолтой хэлээрэй.
