УИХ-ын чуулганы нэгдсэн хуралдаанаар Монгол Улсын 2026 оны төсвийн тухай, Үндэсний баялгийн сангийн 2026 оны төсвийн тухай, Нийгмийн даатгалын сангийн 2026 оны төсвийн тухай, Эрүүл мэндийн даатгалын сангийн 2026 оны төсвийн тухай хуулийн төслүүдийн дөрөв дэх хэлэлцүүлгийг хийж байна. Энэ үеэр УИХ-ын гишүүн П.Сайнзориг "Багш, эмч нарын цалингийн асуудал эртнээс яригдаж байсан. Үүнийг төсвөө өргөн барихдаа тусгахгүй яг батлахынхаа өмнө гэнэт ухаарсан мэт тусгахаар төсвөө задалж байна. Цаашдаа үүн дээрээ анхаарах хэрэгтэй.
Мөн мөнгө байхгүй гэсэн боловч шинэ хөрөнгө оруулалтын төслүүдийг ихээр оруулж ирлээ. Тавдугаар сарын 31-ны дотор тендер, худалдан авалтыг нь хийж чадахгүй бол санхүүжилт нь буцааж татагддаг. Ирэх тавдугаар сард шаардлага хангаагүй, шинэ төслүүд ийм байдалтай зогсохоор харагдаж байна. АН-ынхны санал болгосон шаардлага хангаагүй шинэ төслүүдийг төсөвт оруулж байна. Анх өргөн барьсан төсвийн төслийн хөрөнгө оруулалтын 111 төслийн 81 нь хуульд нийцэхгүй байна гэж дүгнэлт гарсан. Одоо хөрөнгө оруулалтын төслийн тоо нэмэгдээд 158 болсон. Ийм төсөл батлах гэж байгаа нь харамсалтай.
Татварын реформ худлаа болж байна. НӨАТ-ын буцаалтыг таван хувь болгох асуудлаа хойшлуулж ирэх аравдугаар сарын 1-нээс хэрэгжүүжлэхээр болж байгаа юм байна. Тухайн үед төсөв хүнд байвал хэрэгжүүлэхгүй байх магадлалтай. Ингэж ААН нэгж болон иргэддээ худлаа хэлж болохгүй" гэлээ.
