Хүнс, хөдөө аж ахуй, хөнгөн үйлдвэрийн сайд Ц.Идэрбат Засгийн газрын хуралдааны дараа мэдээлэл хийлээ.

Тэрээр "Засгийн газрын хуралдаанаар хөдөө аж ахуйн салбарт тодорхой үр дүнтэй шийдвэрүүдийг гаргалаа.  Хүнсний ногоо тариалагчдад Монгол Улсад мөрдөгдөж байгаа Газрын тухай хуулиар олгогдсон эрхүүдийг нь олгох тал дээр эрчимтэй ажиллах үүргийг нийслэл, аймгийн Засаг дарга нарт өгсөн.

Түүнчлэн дэлхийн дахинд үүсээд байгаа нөхцөл байдалтай холбогдуулан хүнсний ногооны хүртээмж чанарыг сайжруулах хүрээнд нэг тэрбум төгрөгийн үрийн асуудлыг шийдвэрлэж, энэхүү мөнгөөр дөрвөн төрлийн ногооны үр авч, хөнгөлөлттэй үнээр, зээлээр олгох шийдвэр гаргалаа. Нэг тэрбум их мөнгө сонсогдох боловч энэ нь тариаланчдын гар дээр очоод, газрын хөрсөнд шингээд эргээд 18, 19 мянган тонн ногоо болж гарч ирэх юм.

Мөн Засгийн газар зуны болон өвлийн хүлэмжийн асуудалд анхаарлаа хандуулж байна. Зуны хүлэмжид зориулж хүлэмжийн аж ахуй хувиараа эрхлэх хүмүүст 2.1 тэрбум төгрөгийн хүүгүй, урт хугацаатай зээл олгох шийдвэр гаргалаа. Өвлийн хүлэмж ажиллуулж буй ААН, иргэдэд цахилгааны үнийн хөнгөлөлт үзүүлнэ. Өнгөрсөн хугацаанд жилдээ 330 гаруй сая төгрөгийн цахилгааны хөнгөлөлт олгодог байсан бол энэ тогтоол хэрэгжсэнээрээ 400 гаруй сая төгрөгийн хөнгөлөлт үзүүлэх боломжтой болж байна.

Хаврын тариалалтад шаардлагатай 10 мянган тонн шатахууныг одоо байгаа үнээр нь олгох шийдвэрийг гаргаж байна" гэлээ.