Аж үйлдвэр эрдэс баялгийн яамнаас өнөөдөр шатахууны асуудлаар ээлжит цаг үеийн мэдээлэл хийлээ. Энэ үеэр салбарын дэд сайд Б.Энхтүвшин мэдээлэл өглөө. “Манай улсад өдөрт 34 вагон АИ-92 автобензин орж ирвэл өдрийн хэрэгцээ хангагддаг. Харин арванхоёрдугаар сар гарсаар 13 өдөр нь 34-өөс доош тооны вагон орж ирсэн. Өөрөөр хэлбэл, бид нөөцөө бүрдүүлж амжихгүйгээр хилээр орж ирж буй вагоныг шууд түгээлтэд гаргаж байгаа учир шатахууны доголдол үүссэн байна. Тиймээс гадуур шатахуун түгээх станцуудад дараалал үүссэн” хэмээн тайлбарлалаа.
Аж үйлдвэр эрдэс баялгийн яамны Газрын тос бодлогын хэрэгжилтийг зохицуулах газрын дарга Ч.Хишигдалай "Арванхоёрдугаар сарын эхэнд өдрийн хэрэглээг хангахгүй хэмжээний бүтээгдэхүүн орж ирсэн учраас доголдол үүссэн. Өнөөдрөөс эхлэн хэрэгцээнээс давсан илүү бүтээгдэхүүнүүд нийлүүлэгдэж байгаа учир хангамж сайжирч байна. Монгол Улсын өдрийн хэрэглээ 2200-2400 тонн байдаг. Энэ хэрэглээг давсан бүтээгдэхүүн сүүлийн үед нийлүүлэгдэж байна гэсэн үг. Өнөөдөр үүсээд буй оочир дараалал тун удахгүй арилна. Бид өнгөрсөн шөнө шатахууны нөхцөл байдалд хяналт тавьж ажилласан. Дараалал буурсан байна. Тиймээс иргэдийг хүлээцтэй байхыг хүсье” гэлээ.
Салбарын яамнаас шатахууны гол нийлүүлэгч ОХУ-ын Роснефть компанийн Ангарскийн нефт боловсруулах үйлдвэрээс ачилтын мэдээллийг өдөр бүр авдаг бөгөөд
- 2025.12.18 – 53 вагон
- 2025.12.19 – 43 вагон
- 2025.12.20 – 60 вагон АИ-92 автобензин буюу нийт дүнгээр 16 мянган тонн шатахуун нийлүүлжээ.
