Энэ үеэр сэтгүүлчид нэр дэвшигчдийн аль нь ч 3/2-ыг босгыг даваагүй тохиолдолд намын даргын асуудлыг Бага хурлаар шийдсэн нь зөв эсэх, Л.Оюун-Эрдэнэ албан ёсоор чөлөөлөгдөөгүй байхад шинээр дарга сонгосон нь дээд шүүхэд бүртгүүлэхэд нийцэх талаар асууж тодруулсан юм.
Бага хурлыг даргалсан УИХ-ын гишүүн Ж.Бат-Эрдэнэ санал хураалт тооллогын комиссын дүрэм, журмын дагуу явагдсан учир Улсын Дээд шүүхэд бүртгүүлэхэд маргаан гарахгүй гэсэн бол уг комиссыг ахалсан УИХ-ын гишүүн Ж.Алдаржавхлан "МАН-ын дүрмийн 20.3.7-д Их хурлын чөлөөт цагт намын даргын орон гарвал Бага хуралд оролцсон гишүүдийн 3/2-ын саналаар сонгоно гэж заасан байдаг. Хэдэн үе шаттайгаар хэрхэн зохион байгуулах нь тооллогын комиссын шийдэх асуудал" гэв.
Харин УИХ-ын гишүүн Б.Баярбаатар "Улсын дээд шүүхийн нийт шүүгчдийн хуралдаанаас баталсан Улс төрийн намын бүртгэл хөтлөх журмаар намын даргаар сонгогдсон нэр дэвшигчийн материалыг 60 хоногийн дотор хүргүүлнэ. Журманд өмнөх дарга хүргүүлэхээр заасан. Тэгэхээр Л.Оюун-Эрдэнэ шинээр сонгогдсон дарга Д.Амарбаясгаланг Улсын дээд шүүхэд бүртгүүлэх өргөдлийг хүргүүлнэ. Улмаар дээд шүүх 30 хоногийн дотор өргөдлийг хэлэлцэн шийдвэрлэх буюу нийт 90 хоногийн дотор асуудал эцэслэгдэх юм. Л.Оюун-Эрдэнэ дарга өргөдлөө өгсөн. Түүнийг чөлөөлөх тухай тогтоолыг Бага хуралд уншиж танилцуулж, 100 хувийн саналаар батлагдсан" гэв.
