2026 оны эхний улирлын байдлаар Монгол Улсад гадаадын 104 улсын 11.8 мянган иргэн хөдөлмөрийн гэрээгээр болон сайн дураар ажиллаж байна. Энэ нь өмнөх оны мөн үеэс 1.9 мянгаар, өмнөх улирлаас 2.4 мянгаар тус тус өссөн үзүүлэлт юм хэмээн Үндэсний статистикийн хорооноос мэдээллээ.
Энэ оны эхний улирлын байдлаар Монгол Улсаас хөдөлмөрийн гэрээгээр цалин хөлстэй ажил эрхлэхээр нийт 96 хүн гадаадад зуучлагдсан нь өмнөх оны мөн үеэс 54 хувиар, өмнөх улирлаас 44 хувиар тус тус буурчээ.
Гадаад ажиллах хүчний дийлэнхийг эрэгтэйчүүд эзэлж байгаа бөгөөд 10.1 мянга нь эрэгтэй, 1.7 мянга нь эмэгтэй байна. Насны хувьд бүх бүлэгт эрэгтэйчүүд давамгайлж байгаа бөгөөд 35-39 насныхан хамгийн олон буюу 2.2 мянга , харин 20 хүртэлх насныхан хамгийн цөөн буюу 198 хүн ажиллаж байна.
Улс орны харьяаллаар нь авч үзвэл гадаад ажиллах хүчний 59.6 хувийг БНХАУ-ын иргэд эзэлж байгаа бол БНЭУ 6.9 хувь, Филиппин 5.7 хувь, Вьетнам 4.5 хувь, ОХУ 2.8 хувь, Бангладеш 2.7 хувь, АНУ болон БНСУ-ын иргэд тус бүр 2.4 хувь, Балба 2.3 хувийг тус тус бүрдүүлж байна. Харин үлдсэн 10.7 хувийг бусад улсын иргэд эзэлж байна.
