Балтийн тэнгисийн бүсийн Латви улсын зэвсэгт хүчин даваа гарагт тус улсын бүс нутгийн агаарын орон зайд аюул заналхийлэл үүссэн талаар түр хугацаанд анхааруулж, НАТО-гийн агаарын цагдаагийн үүрэг гүйцэтгэж буй сөнөөгч онгоцнуудыг ажиллагаанд оруулсан гэж мэдэгджээ.

“Латви улсын агаарын орон зайд аюул заналхийлэл үүссэнийг мэдэгдэж байна” хэмээн зэвсэгт хүчин X нийгмийн сүлжээнд нийтэлж, тус улсын зүүн хэсгийн хоёр бүс нутгийн оршин суугчдыг гэртээ хоргодохыг уриалсан байна.

Хожим нь цэргийн байгууллага аюул өнгөрсөн, уг биет Оросын хил орчмын Латвийн нутаг дэвсгэрт газардсан байх магадлалтай гэж мэдээлжээ.

Украины цэргийн нисгэгчгүй онгоцууд Финланд, Эстони, Латви, Литва улсын агаарын орон зайд төөрч нэвтрэх тохиолдол гарч байгаа нь Оростой болон түүний холбоотон Беларусьтай хиллэдэг НАТО-гийн орнуудад Украины дайн халих вий гэсэн болгоомжлолыг нэмэгдүүлж байна.

Украин Оросын Балтын тэнгисийн эрэг дэх газрын тос тээвэрлэлтийн боомтуудад довтолж байгаа энэ үед түүний зарим нисгэгчгүй онгоц байгасаа хазайж, хөрш орнуудад аюулгүй байдлын анхааруулга гаргахад хүргэжээ. Латвийн хувьд ийм хэрэг явдал энэ оны эхээр засгийн газар огцроход хүргэсэн юм.

Москва Киевийг НАТО-гийн агаарын орон зайг халхавч болгон ашиглаж, довтолгоо хийж байна гэж буруутгаж байгаа бол Киев өөрийн зарим нисгэгчгүй онгоц Оросын радио дохио саатуулах ажиллагааны улмаас чиглэлээ алдсан гэж мэдэгддэг.

НАТО-гийн орнууд эдгээр хэрэг явдалд Оросыг буруутгаж, хөрш орон руугаа довтолсноор дайныг эхлүүлсэн гэж үздэг.