Бортээгийн ордыг эргэлт, ашиглалтад оруулахтай холбоотой сонгон шалгаруулалтын явцын талаар Тэргүүн шадар сайд Ж.Энхбаяр мэдээлэл өглөө.
Тэрээр "Уул уурхайн нөөцийг эргэлтэнд оруулах, УИХ-аас өгсөн үүрэг, даалгаврыг хэрэгжүүлэх хүрээнд Тавантолгойн бүлэг ордын нэг хэсэг болсон "Бор тээг"-ийн ордыг ашиглалтад оруулахтай холбоотой тендэрийг олон улсад зарласан. Гадаад дотоодын долоон аж ахуйн нэгж санал өгсөн. Урьдчилгаа төлбөр авах том босго байсан. 500 саяас нэг тэрбум ам.доллар хүртэлх саналыг аж ахуйн нэгжүүд өгсөн. Хамгийн өндөр санал өгсөн гурван аж ахуйн нэгж дараагийн шатанд шалгарсан. Гэвч тухайн ААН-үүд нь Засгийн газраас тавьсан босго шаардлага болох 700 оноог хангаагүй. Тиймээс цаашид үндэсний олборлогч "Эрдэнэс Тавантолгой" ХК-д тухайн ордыг ашиглах асуудлыг хариуцуулна. Тэгэхээр гаднын компаниуд Засгийн газраас тавьсан шаардлагыг хангасангүй" гэв.
