Улсын төсвийн хөрөнгөөр хайгууль хийж нөөцийг нь тогтоосон орд газруудын тодорхой хувийг нь төр эзэмшиж иргэдэд хувь хүртээх агуулгатай өөрчлөлтийг 2019 оны Үндсэн хуулийн нэмэлт, өөрчлөлтөөр бий болгосон. Үүний дагуу Баялгийн сангийн тухай хуулийг баталж иргэн бүрийн нэр дээр байгалийн баялгийн өгөөжөөс хуримтлал үүсгэж эхэлсэн юм. Энэ өгөөжийг нэмэгдүүлэх зорилгоор Засгийн газар улсын төсвийн хөрөнгөөр хайгуулийг нь хийсэн орд газруудад үйл ажиллагаа явуулж буй аж ахуйн нэгжүүдтэй хэлэлцээ хийж байгаа. Хэлэлцээ эхнээсээ амжилттай болж өнөөдөр "Хангад Эксплорейшн", "Өсөх зоос", "Энержи ресурс", "Ачит ихт" компанитай Засгийн газар санамж бичигт гарын үсэг зурлаа.
Гарын үсэг зурах ёслолын үеэр Ерөнхий сайд Г.Занданшатар "Эдгээр компанитай суурь зарчмаа тохирч гарын үсэг зурж байна. Тухайн аж ахуйн нэгжүүдийн 34-өөс доошгүй хувийг төр үнэ төлбөргүй эзэмших хуулийн зохицуулалтай. Мөн өгөөжийн 60 хувийг иргэдэд хүртээнэ. Төр 34-өөс доошгүй хувиа ямар байдлаар эзэмшихийг Засгийн газар, УИХ-аар хэлэлцэн шийдвэрлүүлнэ" гэлээ.
