Brent Crude газрын тосны үнэ АНУ-Израилийн Ираны эсрэг дайныг дуусгах тохиролцооны талаар өөдрөг хүлээлт үүссэнтэй холбоотойгоор огцом буурлаа.
Дэлхийн газрын тосны гол жишиг үнэ болох Brent crude ням гарагт 5 хувиас илүү унасан бөгөөд Дональд Трамп мөргөлдөөнийг бүрмөсөн дуусгах боломжийн талаар зөрүүтэй дохио өгсөн байна. Brent фьючерс нэг баррель нь 97.94 ам.долларт хүрч, сарын өмнөхөөс ойролцоогоор 9 хувиар буурсан ч дайн эхлэхээс өмнөх үеэс харьцуулахад гуравны нэгээс илүү өссөн хэвээр байв.
Японы хөрөнгийн зах зээлийн гол индекс болох Nikkei 225 өглөөний арилжаагаар 3 хувиас илүү өсөж, баасан гарагт түүхэн дээд түвшинд хаагдсаны дараа дахин бүх цаг үеийн шинэ дээд үзүүлэлтэд хүрчээ. Энэ нь АНУ-Израилийн Ираны эсрэг дайныг зогсоох найдвар нэмэгдсэнтэй холбоотой.
Трамп ням гарагт олон нийтийн сүлжээнд нийтэлсэн мэдэгдэлдээ Ирантай хийж буй хэлэлцээ “эмх цэгцтэй, бүтээлч байдлаар” үргэлжилж байгаа ч албаныханд “тохиролцоонд яарахгүй байх”-ыг үүрэгдсэн гэжээ.
“Хоёр тал хангалттай цаг гаргаж, зөв шийдвэр гаргах ёстой. Алдаа гаргаж болохгүй!” гэж тэр Truth Social дээр бичсэн байна.
Энэ мэдэгдэл нь Трамп бямба гарагт “ихэнх нөхцөл нь тохиролцогдсон” хэмээн мэдэгдэж, үүнд Ормузын хоолойг дахин нээх асуудал багтсан гэж хэлсний дараа гарчээ.
Сингапур дахь Sparta компанийн газрын тосны зах зээлийн ахлах шинжээч Жүн Го “Үндсэн дүр зураг өөрчлөгдөөгүй хэвээр байна. Ормузын хоолой хаалттай байгаа өдөр бүр 10–11 сая баррель газрын тос зах зээлд нийлүүлэгдэхгүй байна” гэжээ.
“Гэхдээ тохиролцоо хийгдвэл гацаад байсан хөлөг онгоцнуудаас 100 сая баррель газрын тос зах зээл рүү гарна гэж зах зээл хүлээж байна” гэж тэр нэмж хэлсэн байна.
Го мөн ямар ч тохиролцоо хийгдсэн ч зах зээл хэсэг хугацаанд тогтворгүй хэвээр байх магадлалтай гэжээ.
“Үйлдвэрлэл болон боловсруулах үйлдвэрүүдийг бүрэн сэргээж, өмнөх байдалд оруулахад дор хаяж 3–6 сар шаардлагатай гэж Sparta тооцоолж байна” гэж тэр хэлэв.
Иран улс хоёрдугаар сарын сүүлээр дайн эхэлснээс хойш Ормузын хоолойг бодитоор хааж, дэлхийн газрын тосны худалдааны тавны нэг орчмыг тасалдуулсан юм.
АНУ мөн дөрөвдүгээр сарын дундаас Ираны боомтуудад өөрийн хориг тавьж, тус усан зам дахь худалдааны тээврийг улам саатуулжээ.
Трамп Truth Social дахь нийтлэлдээ АНУ-ын хориг “тохиролцоо хийгдэж, баталгаажиж, гарын үсэг зурагдах хүртэл бүрэн хүчинтэй хэвээр байна” гэж мэдэгдсэн байна.
