Сангийн сайд З.Мэндсайхан татварын хуулиудад ямар өөрчлөлт оруулах талаар мэдээлэл өглөө. 

Тэрээр "Татварын хуулиудад өөрчлөлт оруулах хуулийн төслийг УИХ-д өргөн мэдүүлэхээр боллоо. Хүн амын орлогын албан татварт бага, дунд орлоготой иргэдэд зориулсан шаталсан хөнгөлөлт гэж байдаг. Үүнийг хэрэгжүүлнэ. Хөдөлмөрийн хөлсний доод хэмжээ 792 мянган төгрөг байгаа. Тиймээс иргэдийн хөдөлмөрийн хөлсний доод хэмжээтэй тэнцүү хэмжээний цалингийн орлгоос нь татвар тооцохгүй. Тооцсон татварыг нь буцаан олгоно. Хоёр сая төгрөгийн цалинтай хүн байлаа гэхэд 792 мянган төгрөгийнх нь цалингийн татварыг буцаан олгоно. Энэ буцаан олголтыг жилийн эцэст бөөнд олгоно.

Хувиараа хөдөлмөр эрхлэгч орлогын босго хамаарахгүй хялбаршуулсан журмаар нэг хувийн татвар төлдөг байсан. Үүнийг өөрчилж нэг тэрбумаас доош орлоготой тохиолдолд нэг хувийн татвар авдаг болно.

Үл хөдлөх хөрөнгө борлуулахад авдаг хоёр хувийн татварыг авахаа болино.

ААН-ийн татварын өмнөх ашиг нь зургаан тэрбумаас доош бол 10, дээш бол 25 хувийн татвар авч байгаа, аж ахуйн нэгжийн орлогын албан татвар. ҮҮнд өөрчлөлт оруулж зургаан тэрбум хүртэлх ашигтай бол 10, 6-10 тэрбумын ашигтай бол 15, 10 тэрбумаас дээш ашигтай бол 25 хувийн татвар авахаар болж байгаа. Өмнө нь 25 хувийн татвар төлдөг байсан 600 гаруй аж ахуйн нэгж 15 хувийн татвар төлдөг болно.

1.5 тэрбум төгрөгийн борлуулалттай жижиг, дунд ААН-үүд нэг хувийн татвар төлж байгаа. Үүнийг өөрчилж 2.5 тэрбум хүртэлх орлоготой ААН-үүдээс нэг хувийн татвар авна. Ингэснээр 180 мянган ААН-ийн татвар нэг хувь болж ачаалал нь буурна.

НӨАТ төлөгчийн босго 50 сая төгрөг байгаа. Жижиг, дунд ААН-үүдээс энэ босгыг нэмэгдүүлж өгөөч гэсэн хүсэлт их ирдэг. Тиймээс 400 сая төгрөгөөс дээш орлоготой бол НӨАТ төлөгчөөр бүртгэдэг болно.

100 мянган ам.доллароос дээш үнэтэй автомашины 100 мянган ам.доллороос дээших үнийн дүнгээс нь 33 хувийн онцгой албан татвар авна.

Татвараа төлөөлгүй ААН-үүдийн дансыг хаадаг. Үүнийг өөрчилж орлогынх нь 80 хувийг нь татан авдаг болно. Ингэснээр үйл ажиллагаа нь зогсохгүй.

Татварын энэ өөрчлөлтийг хийснээр төсөвт 2.8 их наядын ачаалал үүснэ. Гэхдээ татварын ачааллаа шийдвэрлэх боломж бий.

Хуулийн төсөлдөө татварын өөрчлөлтийг 2026 оны гуравдугаар улирлаас хэрэгжүүлэхээр тусгасан" гэв.