Дэлхийн кино урлагийн хамгийн нэр хүндтэй наадмуудын нэг болох Венецийн олон улсын кино наадам маргааш буюу есдүгээр сарын 2-нд Италийн Лидо аралд 83 дахь удаагаа зохион байгуулагдана. Энэ жилийн наадам есдүгээр сарын 12-ныг хүртэл үргэлжлэх бөгөөд намрын кино фестивалийн улирлыг албан ёсоор эхлүүлж, ирэх жилийн шагналуудын уралдаанд нэр дэвших бүтээлүүдийн анхны томоохон тайз болох юм.
Наадмыг найруулагч Альберто Барбера удирдаж байгаа бол үндсэн уралдааны шүүгчдийн бүрэлдэхүүнийг жүжигчин, найруулагч Мэгги Жилленхолл тэргүүлнэ.
Энэ жил улаан хивснээ Роберт Паттинсон, Жорж Клуни, Пенелопа Крус, Рүүни Мара зэрэг Холливудын томоохон одод цуглах төлөвтэй байна. Жорж Клуни болон жүжигчин Эллен Бёрстин нарын кино урлагт оруулсан хувь нэмрийг нь үнэлж, наадмын дээд хүндэтгэлүүдийн нэг болох насан туршийн амжилтын “Алтан арслан”-гаар шагнах юм. Харин Роберт Паттинсоны тоглосон “Primetime”, Мартин МакДонагийн “Wild Horse Nine”, Флориан Зеллерийн “Bunker” зэрэг бүтээлүүд үзэгчдийн анхаарлын төвд байна.
Венец энэ жил зөвхөн Холливудын одод төдийгүй дэлхийн кино урлагийн томоохон найруулагчдын шинэ бүтээлүүдийг нэг дор цуглуулжээ. Дэнни Бойлийн “Ink” киногоор наадмыг нээх бөгөөд Мартин МакДона, Хирокадзу Корээда, Ли Чан-дон зэрэг нэр хүндтэй уран бүтээлчдийн бүтээлүүд өрсөлдөх юм. Мөн Илон Маскийн тухай Алекс Гибнигийн дөрвөн цаг орчим үргэлжлэх баримтат кино, Ойрх Дорнодын нөхцөл байдлыг хөндсөн “NAZA” зэрэг цаг үеийн хурц сэдэвтэй бүтээлүүд олны анхаарлыг татаж байна.
Ийнхүү Венецийн 83 дахь удаагийн кино наадам урлагийн гоо зүйгээс гадна өнөө цагийн улс төр, нийгэм, хүний оршихуйн асуудлуудыг дэлгэцээр хэрхэн өгүүлж буйг харуулах томоохон талбар болох төлөвтэй байгаа билээ.
