УИХ дахь МАН-ын бүлэг өчигдөр орой ээлжит бусаар хуралдлаа. Хурлаар бүлгийн дарга, УИХ-ын дэд даргыг сонгох тухай асуудлыг хэлэлцжээ.
Бүлгийн хурлаас өмнө МАН-ын Удирдах зөвлөл хуралдаж уг асуудлыг хэлэлцсэн байна. Улмаар Үндсэн хууль зөрчсөн болох нь тогтоогдсон УИХ-ын дэд дарга Х.Булгантуяаг албан тушаалаас нь чөлөөлж, түүний оронд МАН-ын бүлгийн дарга Ж.Бат-Эрдэнийг нэр дэвшүүлэхээр шийдвэрлэжээ.
Мөн УИХ дахь МАН-ын бүлгийн даргад Ж.Батжаргал гишүүнийг нэр дэвшүүлсэн байна.
МАН-ын Удирдах зөвлөлийн дээрх шийдвэрийг УИХ дахь намын бүлэг нь дэмжиж Ж.Батжаргал гишүүнийг даргаараа сонголоо. Мөн Ж.Бат-Эрдэнэ гишүүнийг УИХ-ын дэд даргад нэр дэвшүүлж байгааг дэмжив.
УИХ-ын дэд даргыг хэрхэн сонгохыг УИХ-ын тухай хуулийн 14.1-т "УИХ-ын дэд даргыг сонгуулийн дүнд бий болсон нам, эвслийн бүлэг тус бүрээс нэр дэвшүүлэн, илээр санал хурааж сонгоно. Хуралдаанд оролцсон гишүүдийн олонх дэмжсэн бол УИХ-ын дэд даргыг сонгох тухай тогтоол баталсанд тооцно" гэж заажээ.
