Чуулганы нэгдсэн хуралдаанаар Ерөнхийлөгчийн өргөн мэдүүлсэн УИХ-ын тухай хуульд нэмэлт, өөрчлөлт оруулах тухай хуулийн төслийг хэлэлцлээ. УИХ-ын гишүүнийг эгүүлэн татах агуулгатай энэхүү хуулийн төслийг хэлэлцэх нь зөв эсэхээр маргааш 10:00 цагт санал хураалт явуулахаар болов. 

Өнөөдрийн хэлэлцүүлгийн үеэр УИХ-ын гишүүн Х.Баасанжаргал "Ардчилал нуран унаж байгааг бүгдээрээ нүдээрээ харж байна. Бүгд хүлээн зөвшөөрөх хэрэгтэй. Ямар нөхцөл байдалд байгаагаа хүлээн зөвшөөрье. Яагаад худлаа бүгд дүр эсгээд байгаа юм. Ардчиллыг төрийн эрх мэдлийг булаан авч эргүүлэхээ больчихсон. Яг ийм аргаар нэг нэгээр нь, чимх чимхээр, ямх ямхаар сулруулж төрийн эрх мэдлийг булаадаг болсон. Үүнд бүхэл бүтэн ҮАБЗ тэр чигээрээ оролцож байгаад үнэхээр харамсаж байна. Тэр дундаа хуульчид оролцож байгаад чин сэтгэлээсээ харамсаж байна.

Ерөнхийлөгчийн хууль санаачлах эрх нь ямар нэг хэмжээ хязгааргүй байх ёстой юу гэдэгт судлаачид дүгнэлт хийгээрэй. Энэ хуулийн төслийг хэлэлцэж эхэлснээр Үндсэн хууль зөрчсөн үү гэдэгт дүгнэлт хийгээрэй. Хожим Ерөнхийлөгч ямар асуудлаар ямар хүрээнд дур зоргоороо аашилхыг үнэхээр таашгүй боллоо. Тодорхой хил хязгаар дотор барьдаг байсан. Энэ бүхэн өнөөдрөөс эхлээд эвдэгдлээ.

Өнгөрсөн 30 жилийн алдаа дутагдлыг энэ удаагийн 126 гишүүн, шинээр сонгогдсон 81 гишүүнээс нэхэж байгаа. 30 жил та бүхэн ёс зүйн өндөрлөгт байсан бол бидний амьдрал ийм гунигтай байх ёсгүй. Намайг нэгдүгээр ангид байхад улстөрд байсан ах нар одоо болтол байж л байгаа. Та нар биднийг өөрсдийнхөө утсан хүүхэлдэй болно гэж бодсон. Бид нар тэгээгүй. Тиймээс энэ бол бидэнд зориулсан хууль" гэв.