Засгийн газар "Хангад Эксплорейшн", "Өсөх зоос", "Энержи ресурс", "Ачит -Ихт" компанитай санамж бичигт гарын үсэг зурсантай холбогдуулан "Ачит-Ихт" компанийн үүсгэн байгуулагч П.Цагаан сэтгүүлчдэд мэдээлэл өглөө.
Тэрээр "2019 онд хийсэн Үндсэн хуулийн нэмэлт, өөрчлөлтөд стратегийн ач холбогдолтой ордын өгөөжийн дийлэнх нь буюу 50+1 хувь нь ард түмэнд ногдоно гэж тусгасан. Манай компанийн хувьд "Эрдэнэт" үйлдвэрийн балансын бус хоёрдугаар овоолго дээр үйл ажиллагаа явуулдаг. Бид төрд 34 хувиа өгье гэдэг, авахгүй явсаар байсан. Хувьцаа эзэмшихгүй хоёр хувийн тусгай төлбөр авна гээд өнгөрсөн хугацаанд 40 тэрбумын төлбөр авсан. Ногдол ашиг авдаггүй хувьтай байснаас тусгай АМНАТ төлбөр авсан нь дээр гэдгийг Монгол Улс асар өндөр үнэ цэнээр ойлгосон.
Энэ удаагийн хэлэлцээрээс өмнө Ерөнхий сайдын байгуулсан ажлын хэсэгтэй манай ажлын хэсэг 10 гаруй удаагийн уулзалт хэлэлцээ хийсэн. Зөвшилцөлд хүрээд өнөөдөр гарын үсэг зурлаа. Засгийн газар УИХ-д танилцуулагдаад албажаад явах байх. Энэ тохиролцоогоор манай компани 44 хувиа эзэмшинэ, эсвэл тусгай АМНАТ-өөр оруулна. Хоёр суурь зарчим дээр тохиролцсон.
Нэгдүгээрт, Үндсэн хуулийн нэмэлт өөрчлөлт.
Хоёрдугаарт, компанийн өгөөжийн 60 хувь нь ард түмэнд татвар, төлбөр, хураамж хэлбэрээр очихоор тохиролцсон. Энэхүү гэрээгээ нэр төртэй биелүүлж үлгэр дууриалал үзүүлнэ гэж бодож байна. Ямартай ч бид Үндсэн хуулийн хэрэгжилтийг амьдрал дээр хэрэгжүүлэхэд хувь нэмрээ оруулах гэж байгаадаа баяртай байна" гэлээ.
