Чуулганы нэгдсэн хуралдаанаар Ерөнхийлөгчийн өргөн мэдүүлсэн УИХ-ын тухай хуульд нэмэлт, өөрчлөлт оруулах тухай хуулийн төслийг хэлэлцэж байна. Хэлэлцүүлгийн үеэр О.Номинчимэг гишүүн "УИХ, УИХ-ын гишүүд хариуцлагатай байх ёстой. Ард түмнийг төлөөлдөг үүргээ чин шударгаар хэрэгжүүлдэг байх ёстой. Авилга, албан тушаалын асуудлаас хол байх ёстойг бүгд мэдэж байгаа. УИХ дотор байдаг Ёс зүйн дэд хороо өөрөө ажиллахгүй байгаа учраас дээр нь хариуцлага тооцдог механизм сул байсан учраас үеийн үед энэ асуудал яригдаж байна.
Би хуулийн заримтай нь санал нийлээд заримтай нь нийлэхгүй байна. Ялангуяа УИХ-ын гишүүн болоод ард түмнээс мандат аваад ирсэн бол чуулганы хуралдаа суудаг байх, саналаа өгдөг байх асуудал бол хамгийн анхан шатны үүрэг. Олон улсын жишиг нь тийм. Х.Баттулга гэдэг хүн хойд бүсээс сонгогдчихоод УИХ-ын чуулганд хэдэн удаа суусныг санахгүй байна. Манай Байнгын хороонд нэг ч ирдэггүй. Гэтэл Австралид хүндэтгэн үзэх шалтгаангүйгээр хоёр сараас дээш чуулганы хуралдаа ирэхгүй бол хөөдөг. Суудал нь хүчингүй болдог. Латвид хуралдааныхаа талаас илүүд хүндэтгэн үзэх шалтгаангүйгээр суухгүй бол хөөдөг, суудал нь хүчингүй болгодог. Ийм сахилга хэрэгтэй байна. Тэгэхгүй бол хэдэн залуу гишүүд нь кнопчид болоод, ах нар нь бүгдээрээ хувийн ажлаа хөөцөлдөөд явчихдаг. Үүн дээр сахилга бат байх ёстой. Гэхдээ энэ хууль дээр асуудалд байна.
Нэгдүгээрт, та бүхэн хүнтэй зууралдаад байна. Яагаад асуудал үүсээд парламентийн нэр хүнд унаад байгаа талаарх суурь асуудал руу чиглэсэн зүйл алга. Сонгогдож орж ирсэн хүнтэй нь зууралдаад, ёс зүйгүй, хариуцлагагүй, ашиг сонирхлын зөрчилтэй шийдвэр гаргадаг хүмүүсийг нэр дэвшүүлж сонгодог систем рүү огт орохгүй байна. Улс төрийн намд асуудал байгаа. Улс төрийн намд нь ямар хариуцлага хүлээлгэх юм бэ. Улстөрийн нам болохгүй бүтэхгүй хүмүүсээ нэр дэвшүүлээд байх юм бол яах юм. Улс төрийн намд нь өгч байгаа хариуцлага харагдахгүй, наана нь гарч ирж байгаа хүнтэй нь зууралдсан хуулийн төсөл байна.
Улс төрийн намд хариуцлага хүлээлгэх гаргалгаанууд бий. Ёс зүйн зөрчил хэд хэдэн удаа гаргасан, сахилгын шийтгэл авч байсан хүмүүсээ улс төрийн нам нэр дэвшүүлэхгүй байх хэрэгтэй. Асуудалд холбогдож байсан хүмүүсээ нэр дэвшүүлээд гаргаад ирдэг. Тэгэхээр энэ парламентын нэр хүнд унаад байна" гэлээ.
