Цэргийн байгууллага дахь цэвэрлэгээгээ үргэлжлүүлж буй Хятад улс пүрэв гарагт батлан хамгаалахын сайд асан хоёр хүнд авлигын хэргээр цаазаар авах ял оноолоо.
Вэй Фэнхэ, Ли Шанфу нарыг хээл хахууль авсан хэрэгт буруутай гэж үзэн цэргийн шүүхээс хоёр жил хойшлуулах нөхцөлтэйгөөр цаазаар авах ял оноосон тухай төрийн хэвлэлүүд мэдээлжээ.
Шүүхийн мэдэгдэлд тэдний ялыг хоёр жилийн дараа өршөөлгүйгээр бүх насаар хорих ял болгон өөрчилнө гэж дурдсан байна.
72 настай Вэй Фэнхэ 2018–2023 онд Батлан хамгаалахын сайдаар ажиллаж байсан бол 68 настай Ли Шанфу 2023 онд түүнийг залгамжилсан ч найман сар хүрэхгүй хугацаанд алба хашжээ. Хоёуланг нь 2023 онд Хятадын армийн авлигатай тэмцэх байгууллага шалгаж эхэлсэн байна.
Ши Жиньпин армийн цэвэрлэгээгээ хамгийн дээд түвшинд хүргээд байгаа бөгөөд хамгийн сүүлд нэгдүгээр сард Вэй болон Ли нараас ч өндөр албан тушаалтай генерал Зан Юушиаг албан тушаалаас нь чөлөөлсөн.
Ши Жиньпиний бодлогын дүнд 2022 оноос хойш 100 гаруй офицер албан тушаалаасаа зайлуулагдсан байж болзошгүй гэж үзэж байна. Хятадын арми 2 сая орчим бүрэлдэхүүнтэй.
Вашингтонд төвтэй Center for Strategic and International Studies байгууллагын хоёрдугаар сард нийтэлсэн тайланд дурдсанаар 2022 оноос хойш 36 генерал болон дэслэгч генерал албан ёсоор цэвэрлэгээнд өртсөн бол өөр 65 офицер сураггүй болсон эсвэл цэвэрлэгээнд өртсөн байж болзошгүй аж.
Мөн нэг албан тушаалд олон удаа цэвэрлэгээ хийснийг тооцвол Хятадын Ардын чөлөөлөх армийн дээд удирдлагын албан тушаалын 52 хувь нь нөлөөлөлд өртсөн гэж тайланд дурджээ.
Энэхүү өргөн хүрээтэй цэвэрлэгээ нь Ши Жиньпиний эрх мэдлээ улам бэхжүүлэх, цэргийн шинэчлэлээ эрчимжүүлэх урт хугацааны бодлогын нэг хэсэг гэж үзэж байна.
Гэвч “урьд өмнө байгаагүй” хэмжээний энэхүү цэвэрлэгээ нь Хятадын армийн цэргийн ажиллагаа явуулах бэлэн байдалд нөлөөлж болзошгүй талаар тайлангийн зохиогчид анхааруулжээ.
Жан Юөся болон түүний туслах унасны дараа нэр дурдсан цэргийн удирдагчдийг Ши Жиньпиний дээд эрх мэдлийг сулруулахыг оролдсон хэмээн буруутгаж, авлигад “тэг хүлцэл”-ийн бодлогыг дахин онцолсон байна.
