УИХ-ын чуулганаар Олон хүүхэд төрүүлж өсгөсөн эхийг урамшуулах тухай хуульд нэмэлт өөрчлөлт оруулах тухай хуулийн төслийг эцэслэн баталлаа. Ингэснээр ээжүүд 0-1 насанд эндсэн хүүхдээ одонгийн хүүхдийн тоонд хамруулах эрхзүйн орчин бүрдэж байгаа юм.
Мөн заавал хүүхэд нь нэг нас хүрсний дараа алдарт эхийн одон авдаг зохицуулалтыг халж буй. Өөрөөр хэлбэл, төрөөд нэг сар болж байгаа эх материалаа бүрдүүлж, одон авах боломжтой.
2027 оны нэгдүгээр сарын 1-нээс уг хууль хүчин төгөлдөр хэрэгжиж эхэлнэ. Хуулийн хэрэгжилтэд хамрагдах хүсэлтэй эхчүүд хүсэлтээ гаргаж, бичиг баримтаа бүрдүүлж өгснөөр одонгоо авах юм. Энэ хууль хэрэгжиж эхэлснээр 27 100 ээж "Эхийн алдар II", "Эхийн алдар I" 10 154 одон авна гэсэн тооцоолол гарсан аж.
Ташрамд дурдахад, "Эхийн алдар” I, II зэргийн одон гардуулах ёслол тав дахь өдрөө үргэлжилж байна. Энэ онд улсын хэмжээнд 12 306 ээж Алдарт эхийн одон авчээ.
