Он солигдох мөч ойртож баярын өдрүүд үргэлжилж байгаа ч нийгэм үнэхээр бухимдалтай байна. Ялангуяа, улаанбаатарчууд бухимдал дүүрэн, төв талбайд гарч эсэргүүцлээ илэрхийлэхэд бэлэн болов. Энэ нь шатахууны хомсдолтой шууд холбоотой. Иргэд гэр бүлдээ, ажилдаа зарцуулах цагаа шатахуун авахын төлөө ШТС-уудад дугаарлан өнгөрүүлсээр удлаа. Засгийн газрын зүгээс удахгүй байдал хэвийн болно гэж мэдэгдэж байгаа ч нөхцөл байдал дээрдэхгүй байна. Монгол Улсын шатахуун импортлогч ОХУ-ын шатахууны үйлдвэрлэл, нийлүүлэлт дайны нөлөөгөөр доголдож эхэлсэн. Газрын тосны нөөцтэй ч дотооддоо шатахуун үйлдвэрлэдэггүй, 100 хувь импортын хараат манай улс энэ өдрүүдэд дотооддоо шатахуун үйлдвэрлэдэг болох нь хэчнээн чухал болохыг ойлгож байна. Үүний тулд Дорноговь аймгийн Алтанширээ суманд барьж буй Газрын тос боловсруулах үйлдвэрээ яаралтай ашиглалтад оруулах нь чухал. Тийм ч учраас тус үйлдвэрийн бүтээн байгуулалтад ашиглах Энэтхэгийн Засгийн газрын хөнгөлөлттэй зээлийг яаралтай, үр дүнтэй ашиглах зорилгоор УИХ Гадаад зээллэгийн ашиглалт, үр ашгийг нэмэгдүүлэх тухай анхдагч хуулийн төслийг хэлэлцэж эхэллээ.
Шатахууны хараат байдлыг бууруулахын тулд олон чиглэлээр арга хэмжээ авч ажиллах ёстой. Гэвч Засгийн газар энэ өдрүүдэд “ОХУ-тай хэлэлцээ хийж байгаа. Удахгүй хэвийн болно” гэсэн тайлбараас өөр зүйл хийсэнгүй. Харин УИХ-ын дарга бөгөөд МАН-ын дарга Н.Учрал Засгийн газрын ажлыг хийж эхлэв. Эрх баригч намын даргын хувьд тэрээр Ерөнхий сайд болох нь цаг хугацааны л асуудал. Ерөнхий сайд Г.Занданшатар 2027 оны Ерөнхийлөгчийн сонгууль хүртэл огцрохгүй тэсэж чадвал УИХ-ын дарга Н.Учрал тэр үед, тэсэхгүй бол түүнээс ч наана Ерөнхий сайд болно. Тиймээс Ерөнхий сайд болох бэлтгэлээ хангаж эхлэв үү гэлтэй УИХ-ын дарга Засгийн газрын ажлыг хийж эхэллээ. Тухайлбал, өчигдөр УИХ-ын даргын Н.Учрал “Эрчим хүчний болон газрын тосны бүтээгдэхүүний хараат байдлыг бууруулах 3х100 арга хэмжээ” хөтөлбөрөө танилцуулж, уг санаачилгын хүрээнд боловсруулсан тогтоолын төслийг салбарынхантай хэлэлцлээ. Уулзалтын эхэнд өнөөгийн нөхцөл байдлыг холбогдох статистик үзүүлэлтүүдийн хамт танилцуулж, тулгамдсан асуудлуудад зорилтот шийдлүүдийг дэвшүүлж, эдгээрийн санхүүжилт болон төрийн оролцооны хэлбэрийн талаар санал солилцсон байна. Уулзалтад УИХ-ын гишүүдээс гадна хувийн хэвшил, олон улсын байгууллагын төлөөлөл болон эрчим хүчний салбарын шинжээчид оролцжээ.
УИХ-ын дарга Н.Учрал “Шатахууны хараат байдал болон цахилгаан тээврийн хэрэглээг харьцуулахад нийт 918 мянган тээврийн хэрэгсэл байгаагаас ердөө 1000 орчим нь цахилгаан автомашин байна. Иймд ногоон эрчим хүчний хөгжлийг бодлогоор дэмжих зорилгоор эрчим хүчний хараат байдлыг бууруулах иж бүрэн санаачилгыг үндсэн гурван чиглэлд хэрэгжүүлэхээр Засгийн газарт чиглэл өгөх тухай УИХ-ын тогтоолын төсөлд тусгасан. Цахилгаан автомашины хэрэглээг дэмжих, 100 байршилд цахилгаан машин цэнэглэх иж бүрэн зогсоол байгуулах хөтөлбөр багтсан” гэжээ.
Уулзалтын үеэр УИХ-ын Эдийн засгийн байнгын хорооны дарга Р.Сэддорж цахилгаан автомашины тоо чамлалттай байгааг дурдаад, хэрэглээг нь илүү нэмэгдүүлэхийн тулд бодлогоор дэмжихээ илэрхийлсэн байна.
Ирээдүйн Ерөнхий сайд Н.Учрал “Эрчим хүчний болон газрын тосны бүтээгдэхүүний хараат байдлыг бууруулах 3х100 арга хэмжээ” хөтөлбөр хэрэгжүүлснээр цахилгаан автомашины тоог 100 мянгад хүргэнэ гэж тооцжээ.
