АНУ Энэтхэгийн тэрбумтан Гаутам Аданигийн эсрэг үүсгэсэн эрүүгийн залилангийн хэргийг хэрэгсэхгүй болгохоор зэхэж байгаа бөгөөд тэрээр АНУ-ын үнэт цаасны зохицуулагч байгууллагатай иргэний залилангийн нэхэмжлэлийг шийдвэрлэх хүрээнд 18 сая ам.доллар төлөхөөр тохиролцжээ.
63 настай Адани нь эрчим хүч, боомт, нисэх буудал, дэд бүтэц зэрэг олон салбарт үйл ажиллагаа явуулдаг Энэтхэгийн хамгийн том конгломератуудын нэг болох Adani Group-ийн тэргүүн юм. Forbes-ийн үнэлгээгээр түүний хөрөнгө 82 тэрбум ам.долларт хүрч, дэлхийн хамгийн баян хүмүүсийн нэгт тооцогдож байна.
Тэрээр өөрийн зээ хүү Сагар Аданийн хамт АНУ-ын Холбооны үнэт цаасны зохицуулах хороотой тохиролцоонд хүрсэн байна. Гэхдээ энэ тохиролцоонд нь шүүхийн зөвшөөрөл шаардлагатай. Тэд буруутгалыг хүлээн зөвшөөрөөгүй, мөн няцаагаагүй гэнэ.
The New York Times-ийн мэдээлснээр, АНУ-ын Хууль зүйн яам Адани, түүний зээ хүү болон Adani Green Energy-ийн гүйцэтгэх захирал асан Внийт Жайн нарт холбогдох эрүүгийн залилангийн хэргийг хэрэгсэхгүй болгохоор бэлтгэж байгаа аж. Тэд үнэт цаасны залилан, хуйвалдаан болон цахим шилжүүлгийн залилангийн хэрэгт буруутгагдаад байсан юм.
Энэхүү өөрчлөлт нь Адани шинэ өмгөөллийн баг хөлсөлсний дараа гарчээ. Тус багийг нэр хүндтэй Sullivan & Cromwell хуулийн фирмийн хамтарсан дарга Роберт Ж. Жиуффра ахалж байгаа бөгөөд тэрээр Трампын “hush-money” хэргийн эрүүгийн ялын эсрэг давж заалдах ажиллагаанд ч мөн өмгөөлөгчөөр нь ажиллаж байсан.
SEC 2024 онд Адани болон түүний хамтрагчдыг Энэтхэгийн төрийн албан тушаалтнуудад ойролцоогоор 265 сая ам.долларын авлига өгч, 20 жилийн хугацаанд бараг 2 тэрбум ам.долларын ашиг олох боломжтой нарны эрчим хүчний ашигтай гэрээнүүдийг авахыг оролдсон гэж буруутгаж байв.
Мөн тус компани 750 сая ам.долларын бонд босгох үеэрээ — үүнээс 175 сая орчим нь АНУ-ын хөрөнгө оруулагчдаас орж ирсэн — авлигын эсрэг бодлогынхоо талаар АНУ-ын хөрөнгө оруулагчдыг төөрөгдүүлсэн гэж SEC мэдэгдэж байсан.
Тохиролцооны хүрээнд Адани нар хөрөнгө оруулагчдыг төөрөгдүүлэх, үнэт цаасны залилан болон зах зээлийн манипуляцитай холбоотой АНУ-ын залилангийн эсрэг гол хуулиудыг дахин зөрчихийг хориглосон байна.
Adani Group эдгээр буруутгалыг үргэлж “үндэслэлгүй” хэмээн няцаасаар иржээ.
Өнгөрсөн сард Жиуффра Вашингтон дахь Хууль зүйн яамны төв байранд албаныхантай уулзаж, прокурорууд хэрэг үүсгэхэд хангалттай нотлох баримт болон эрх зүйн харьяалал байхгүй гэсэн агуулгатай 100 орчим слайд танилцуулсан байна.
Уулзалтын үеэр мөн ер бусын санал тавигджээ. Хэрэв прокурорууд хэргийг хэрэгсэхгүй болговол Адани АНУ-ын эдийн засагт 10 тэрбум ам.долларын хөрөнгө оруулж, 15000 ажлын байр бий болгоно гэж амласан байна. Энэ нь Адани 2024 оны сонгуульд Трамп ялсны дараахан өгч байсан амлалтаа давтан хэлсэн хэрэг байв.
Прокурорууд энэхүү хөрөнгө оруулалтын санал нь хэргийг шийдвэрлэхэд “ямар ч нөлөө үзүүлэхгүй” гэж мэдэгдсэн ч эх сурвалжууд The Times сонинд хэлэхдээ уг санал Хууль зүйн яамны албаныхнаас “эерэг хариу” авсан гэжээ.
Энэ мэдээний дараа Adani Group-ийн хувьцааны ханш өсжээ.
2024 оны арваннэгдүгээр сард зарлагдсан эрүүгийн яллах дүгнэлтэд Адани болон түүний хамтрагчдыг Энэтхэгийн хамгийн том сэргээгдэх эрчим хүчний төслүүдийн нэгийн гэрээг авахын тулд авлигын схем зохион байгуулсан гэж буруутгасан юм.
Мөн тэд авлигын талаар мэдээлэл өгөөгүй атлаа олон улсын хөрөнгө оруулагчдаас зээл болон бондын арилжаагаар 3 тэрбум ам.доллараас илүү хөрөнгө босгосон гэж үзэж байв.
Тухайн үед яллагдагчдын хэн нь ч АНУ-ын хорих байгууллагад байгаагүй бөгөөд тэднийг баривчлах захирамжийг олон улсын хууль сахиулах байгууллагуудад хүргүүлэхээр бэлтгэсэн байжээ.
