Энэ зун сая сая гадаадын жуулчин Мексикт болох хөлбөмбөгийн ДАШТ-ийг үзэхээр очихдоо зөвхөн өнгөлөг хөлбөмбөгийн ханын зургууд, тоглогчдын аварга том хөшөө, хөгжөөн дэмжигчдийн наадамтай тулгарахгүй.

Тус улсын аялал жуулчлалын гол төвүүдэд зочид аюулгүй байдлыг хангах зорилгоор хамгаалалт чангарч, цагдаагийн хүч нэмэгдсэнийг харах болно.

Мексикийн засгийн газар тэмцээн зохион байгуулагдах гурван хот болох Мехик, Гуадалахара, Монтеррейгээс гадна багуудын бэлтгэлийн баазууд байрлах бүсүүдэд 100 000 гаруй хамгаалалтын ажилтан байрлуулахаар төлөвлөжээ.

Энэ нь Майягийн домгийн өдөт могой бурхны нэрээр нэрлэгдсэн “Plan Kukulkan” хэмээх аюулгүй байдлын томоохон стратегийн нэг хэсэг юм. Холбооны, мужийн болон орон нутгийн олон арван байгууллага, түүнчлэн хамтран зохион байгуулагч Канад, АНУ-ын  байгууллагууд хамтран ажиллаж байна.

Мэргэжилтнүүдийн үзэж буйгаар Мексик энэ зуны турш аюулгүй байдлаа мэдэгдэхүйц сайжруулж байгаа аж. Хөгжөөн дэмжигчид харьцангуй сайн хамгаалалттай байх ч улсын зарим хэсэгт оршин суугчид болон жуулчдад янз бүрийн түвшний эрсдэл учруулж болзошгүй аюул занал хэвээр байх бололтой.

Мехико хот

Тэмцээний нээлтийн тоглолтыг багтаасан таван тоглолт зохион байгуулагдах нийслэл Мехико нь улсын хамгийн аюулгүй хотуудын нэг гэж тооцогддог ч эрсдэл огт байхгүй гэсэн үг биш.

Энд томоохон хар тамхины бүлэглэлүүд бусад хотууд шиг давамгайлдаггүй ч хулгайн барааны худалдаа, хүний наймаа, биеэ үнэлэлт, хар тамхины наймаа, дарамт шахалт зэрэг гэмт хэрэг үйлддэг бүлгүүд идэвхтэй ажилладаг талаар судлаачид хэлдэг.

Жуулчид халаасны хулгай, дээрэм, залилан зэрэг томоохон хотуудад түгээмэл тохиолддог гэмт хэрэгтэй ч тулгарч болзошгүй.

Мехико хот даяар 56 000 орчим цагдаа, тусгай нэгж, аялал жуулчлалын цагдаа, агаарын хяналтын хүч ажиллуулах аж.

Гуадалахара

Дөрвөн хэсгийн тоглолт зохион байгуулах Гуадалахара нь Мексикийн хамгийн том хоёр асуудал болох картелийн хүчирхийлэл, сураггүй алга болсон хүмүүсийн асуудалтай тулгарч байна.

Хот нь Жалиско мужийн төв бөгөөд энд улсын хамгийн хүчирхэг гэмт бүлэглэлүүдийн нэг болох Jalisco New Generation Cartel ноёрхдог.

Тус мужид ойролцоогоор 16 000 хүн сураггүй алга болсон гэсэн бүртгэл бий. Мөн сүүлийн жилүүдэд ДАШТ болох цэнгэлдэх хүрээлэнгийн ойролцоо ч олон хүний цогцос олдож байжээ.

Мэргэжилтнүүдийн үзэж буйгаар эдгээр томоохон гэмт хэргүүд ихэвчлэн орон нутгийн оршин суугчдад нөлөөлдөг ч жуулчид жижиг хулгай, залилангийн бай болох эрсдэлтэй хэвээр байгаа юм.

Монтеррей

Монтеррей хот мөн зохион байгуулалттай гэмт хэргийн нөлөө ихтэй бүсэд тооцогддог.

АНУ-тай хил залгаа Нуэво Леон мужид байрладаг учраас хар тамхины наймааны чухал коридор болдог. Мөн түлшний хулгай, картелиудын мөргөлдөөн, мөнгө угаах ажиллагаагаар алдартай. Гэсэн хэдий ч өндөр түвшний гэмт хэрэг жуулчдад шууд нөлөөлөх магадлал бага гэж шинжээчид үзэж байна.

Улс даяарх эрсдэлүүд

Хуурамч ДАШТ-ий тасалбар худалдах залилан,

Хуурамч аяллын багц, үйлчилгээ,

Хүний наймаа,

Секс аялал жуулчлалтай холбоотой гэмт хэрэг нь улсын аль ч хэсэгт тохиолдож болзошгүй эрсдэлүүд юм.

Оршин суугчдын аюулгүй байдал орхигдож байна уу?

Шинжээчдийн үзэж буйгаар ДАШТ-ийн үеэр Мексикийн томоохон хотууд гадаадын жуулчдад ерөнхийдөө аюулгүй байх төлөвтэй байгаа аж.

Гэвч тэмцээн дууссаны дараа жуулчид буцаж, аюулгүй байдлын нэмэлт нөөц татагдсаны дараа Мексикт картелийн хүчирхийлэл, сураггүй алга болсон хүмүүсийн асуудал, хүний наймаа зэрэг олон жилийн асуудлууд хэвээр үлдэнэ.

Иймээс зарим иргэний байгууллагууд засгийн газар гадаадын жуулчдын аюулгүй байдалд илүү их анхаарч, өөрийн иргэдийн асуудлыг хангалттай шийдвэрлэхгүй байна хэмээн шүүмжилж эхэлжээ.