Засгийн газрын ээлжит хуралдаан өнөөдөр боллоо. Хурлаар гарсан шийдвэрийн талаар Боловсролын сайд Л.Энх-Амгалан мэдээлэл хийлээ.

"Өнөөдрийн хуралдаанаар ногоон, ухаалаг, эрүүл, аюулгүй сургуулийн загварыг танилцуулж, 2026-2027 оны хичээлийн шинэ жилд улсын хэмжээнд 100 сургуулийг шинэчлэн зохион байгуулахаар боллоо. Ерөнхий сайдын "Чөлөөлье" санаачлагын хүрээнд ногоон чөлөөлөлтийг хийж, боловсролын салбараас эхэлж байна. Хоёрт, COP17 олон улсын хуралд Засгийн газраас цөлжилт, уур амьсгалын өөрчилттэй тэмцэх бодлогоо танилцуулж байна. Боловсролын ногоон чөлөөлөлтийг ямар загвараар хийх вэ гэдгийг танилцуулах боломж олдож байна. Энэ хичээлийн жилээс "Гэрт ойр сургууль хамгийн сайн сургууль" бодлогыг хэрэгжүүлэх гэж байна. Хотхоны бага сургууль, төрөлжсөн ахлах сургуулиуд гээд өндөр ачаалалтай сургуулийг дахин төлөвлөлтөд оруулж, 45-аас дээш сурагчтай ангиудын 80 орчим хувь нь 35-40 сурагтай болно. Энэ жил нэг ч сургууль гурван ээлжээр хичээллэхгүй. 

Гэрт ойрхон сургууль хамгийн сайн сургууль, гэрт ойрхон цэцэрлэг хамгийн сайн цэцэрлэг гэж ойлгох ёстой. Тэр сургууль, цэцэрлэг нь өөрөө ногоон, ухаалаг, эрүүл аюулгүй байх ёстой юм байна.  

Улсын хэмжээнд 2400 орчим боловсролын байгууллагад 1.3 сая хүн суралцаж байна. Энэ нь цэцэрлэгээс эхлээд их, дээд сургууль хамрагдана. Нийт 114 мянган багш ажиллаж байна. Үндсэндээ цэцэрлэг, сургуулийн орчин эрүүл аюулгүй байх ёстой. Судалгаагаар улсын хэмжээнд ЕБС болон цэцэрлэгийн барилгын 50 хувь нь 1990 оноос өмнө баригдсан, маш их дулаан алдагдалтай байдаг. Хөдөө орон нутагт нүүрс, мод түлж байгаа сургууль байна. Улсад 30-40 сургууль мод, нүүрс түлж байгаа бол нийслэлд нам даралтын зуухтай 40 орчим байна. Ерөнхийлөгчийн санаачилсан "Тэрбум мод" хөтөлбөр хэрэгжиж байхад сургууль, цэцэрлэг нь мод түлдэг байж болохгүй. Ерөнхийдөө сургууль, цэцэрлэгийн халаалтын зардлыг орон нутгаас санхүүжүүлдэг. Нэгтгэсэн мэдээллээр жил бүр улсын хэмжээнд 717 төрийн өмчийн сургууль, 1000 гаруй цэцэрлэгийн байрыг халаахад 418 тэрбум төгрөгийн тогтмол зардал гарч байна. Энэ бол маш үрэлгэн тогтолцоо. Тиймээс эхний ээлжинд 100 сургуулийг ухаалаг болгох гэж байна. Мөн усаа дахин боловсруулдаг, сургууль нь өөрөө эрүүл, аюулгүй байх ёстой. Цэцэрлэгийн гурван настай хүүхэд болон нэг, зургаа, ес, 12 дугаар ангийн 300 мянга орчим хүүхдүүдийг эрт илрүүлэгт хамруулна. Тэгэхээр сургууль, цэцэрлэгт суурилсан эрт илрүүлгээс гадна сэтгэл зүйч, хоол зүйч хамтран ажиллана. Үдийн хоол хөтөлбөр хэрэгжинэ. Энэ жилээс эрүүл мэндийн хичээл орно. Сургууль дээр хүүхэд эрүүл аюулгүй байхад анхаарч, шинэ менежментийг хэрэгжүүлэх юм. Мөн энэ жил 100 мянган хром бүүкийг сургууль, цэцэрлэгүүдэд тараана. Үүний цаана Person, Edduten хичээлийг заах боломжоор хангана. Хичээлийн жилээс олон нийтийн сүлжээ ашиглахыг хориглож байгаа. Мөн 1200 сургууль, цэцэрлэгийн нүхэн жорлонг ашиглахаа болих ажлыг энэ жил дуусгана. Хөдөөний 332 сургуулийн 317 нь цэвэрлэх байгууламжаа бүрэн шинэчилсэн бол 218 цэцэрлэгийн 210 нь шинэчилсэн байна. Дотуур байрны 245-аас 237 нь бүрэн шинэчлэгдсэн байна. Ингээд 2026 оны аравдугаар сарын 1-нээс өмнө нэг ч сургууль, цэцэрлэг нүхэн жорлонгүй болно. Үүнээс гадна хүүхэд сургууль дээрээ өдөрт цэвэршүүлсэн 2 литр ус уух "Амин ус" хөтөлбөр хэрэгжүүлнэ. Энэ бол эрүүл, аюулгүй сургууль болох үндэс болж байгаа юм. Хүүхэд сургуулиасаа гараад гэртээ орчих аюулгүй байх орчныг хийх болно. " гэв.