Үндэсний статистикийн хорооноос Монгол Улсын нийгэм, эдийн засгийн 2025 оны есдүгээр сарын үзүүлэлтийг танилцууллаа.
Нийгмийн даатгалын сангийн орлого 2025 оны эхний есдүгээр сард 4 851 4 их наяд төгрөгт хүрч, өмнөх оны мөн үеэс 666.4 тэрбум төгрөгөөр буюу 15.9 хувиар өссөн байна. Орлого өсөхөд тэтгэврийн даатгалын сангийн орлого 515.7 тэрбум төгрөгөөр, тэтгэмжийн даатгалын сангийн орлого 66.9 тэрбум төгрөгөөр нэмэгдсэн нь голлон нөлөөлжээ.
Харин нийгмийн даатгалын сангийн зарлага энэ хугацаанд 4380.9 их наяд төгрөгт хүрч, өмнөх оны мөн үеэс 620.0 тэрбум төгрөгөөр өссөн байна. Үүнд тэтгэврийн даатгалын сангийн зарлага 540.0 тэрбум төгрөгөөр, тэтгэмжийн даатгалын сангийн зарлага 37.8 тэрбум төгрөгөөр нэмэгдсэн нь нөлөөлсөн байна.
2025 оны эхний есдүгээр сард тэтгэврийн даатгалын сангаас 520.4 мянган хүнд нийт 4017.2 тэрбум төгрөгийн тэтгэвэр олгожээ. Энэ нь өмнөх оны мөн үеэс тэтгэвэр авагчдын тоо 12.6 мянгаар, олгосон тэтгэврийн хэмжээ 541.5 тэрбум төгрөгөөр өссөн дүн юм.
Тэтгэвэр авагчдын 79.6 хувь нь өндөр настны, 12.1 хувь нь хөгжлийн бэрхшээлтэй иргэн, 4.0 хувь нь тэжээгчээ алдсаны, 4.3 хувь нь цэргийн тэтгэвэр авагч байгаа юм.
Мөн тэтгэмжийн даатгалын сангаас 2025 оны эхний есдүгээр сард 145.9 мянган хүнд 359.9 тэрбум төгрөг олгосон нь өмнөх оны мөн үеэс тэтгэмж авагчид 9.6 мянган хүнээр, олгосон тэтгэмжийн хэмжээ 76.1 тэрбум төгрөгөөр өсжээ.
Жирэмсэн болон амаржсаны тэтгэмжийг 2025 оны эхний есөн сарын байдлаар 39.7 мянган хүнд 164.5 тэрбум төгрөг болгон олгосон нь өмнөх оны мөн үеэс 1.7 мянган хүнээр, олгосон тэтгэмжийн хэмжээ 30.3 тэрбум төгрөгөөр өссөн байна.
