ТББХ-ны хуралдаанаар Ерөнхий сайд Г.Занданшатарыг огцруулах эсэх асуудлыг хэлэлцсэнтэй холбоотойгоор ЗГХЭГ-ын дарга С.Бямбацогт, Тэргүүн шадар сайд Н.Учрал тэргүүтэй УИХ-ын гишүүд мэдээлэл хийлээ.
ЗГХЭГ-ын дарга С.Бямбацогт "Байнгын хорооноос Ерөнхий сайдын огцруулахыг дэмжихгүй гэх томъёоллоор санал хураалт явуулах юм бол хэд, хэдэн хууль зөрчинө. Нэгдүгээрт, УИХ-ын гишүүдийн дөрөвний нэгээс доошгүй хувийн гаргасан Ерөнхий сайдыг огцруулах саналыг нийт хурлын гишүүдээр хэлэлцүүлэх агуулга бүхий Үндсэн хууль, дэгийн хуулийн зохицуулалтууд зөрчигдөнө. Хоёрдугаарт, УИХ-ын чуулганы хуралдааны зарчим алдагдана. Гуравдугаарт, УИХ-ын дарга буюу хуралдаан даргалагч УИХ-ын үйл ажиллагаанд хууль сахин биелүүлэх үндсэн үүргээ хэрэгжүүлээгүйд тооцогдоно. Улмаар албан тушаалаасаа огцрох эрх зүйн үндэслэл бүрдэнэ. Мөн Ерөнхийлөгч хориг тавих нөхцөл бүрдэнэ. Энэ мэт үр дагавартай. Тиймээс Үндсэн хуулиа зөрчихгүй санал хураалт явуулах учиртай. УИХ Үндсэн хууль зөрчиж, төрийн эрх мэдлийг хууль бусаар авах үйлдэл болох гэж байна.
Тэргүүн шадар сайд Н.Учрал "2016 оноос хойш парламентын гишүүнээс ажиллахдаа ийм увайгүй үйлдлийг анх удаа харж байна. Хуулийг гууль болгож, төрийн эрх мэдлийг Үндсэн хуулийн бус замаар авах увайгүй үйлдэл гаргаж байна. Ерөнхий сайдыг нийт гишүүдийг дөрөвний нэг огцруулах санал тавьсан бол нийт гишүүдийн олонхоор огцорсонд тооцдог. Гэтэл өнөөдөр УИХ-ын гишүүд гэнэт манай Засгийн газарт хайр зарлаж, огцруулахыг дэмжихгүй гэх санал өглөө. Гэтэл хууль бус санал хураалт явуулахаар ажиллаж байж. Энэ бол Засгийн газрыг хууль бусаар огцруулах арга заль, ов мэх гэж харж байна. Цаашдаа сандал суудал, албан тушаал яах вэ. Эх орноо хайрлах сэтгэлтэй бай. Ингэж улайрахаа зогсоо гэдгийг хариуцлагатайгаар хэлмээр байна"
Сангийн сайд Б.Жавхлан "Тооны хэлээр хасах хасахын нэмэх гэдэг буруу зам руу УИХ-ыг Үндсэн хууль зөрчих булан руу аваачиж байна. Засгийн газрыг огцруулах асуудал Үндсэн хуулийн тусгай дэгээр явдаг. Тэр дэгийн дагуу УИХ дээр, уг томьёоллоор санал хураах хүртэл бидний хэсэг нөхөд УИХ-ын ирцэнд орохгүй гэдгээ албан ёсоор мэдэгдэж байна.
