Монгол Улсад зохион байгуулагдаж буй Цөлжилттэй тэмцэх НҮБ-ын конвенцын Талуудын 17 дугаар бага хурлын /COP17/ хүрээнд "Fashion4Land” форум болон загварын шоуг зохион байгууллаа. Тус форумын үеэр байгалийн ширхэгт материал, газрын тогтвортой менежмент болон загварын салбарын хөгжлийн шинэ хандлагыг хэлэлцэж, залуучуудын бүтээлч санаачилга, тогтвортой загварын шийдэл, ноос болон бусад байгалийн ширхэгтийн ирээдүйн боломжийг оролцогчид онцоллоо.
НҮБ-ын Цөлжилттэй тэмцэх конвенцын Fashion4Land санаачилгын үзэл баримтлалд хөвөн, ноолуур, ноос, модонд суурилсан ширхэгт болон синтетик материал зэрэг түүхий эд нь газрын нөөцөд өөр өөрийн ул мөр үлдээдэг болохыг онцолж байна. Тиймээс загварын салбарын тогтвортой шилжилт нь зөвхөн үйлдвэрлэлийн технологийн асуудал бус, газрын эрүүл мэнд, усны нөөц, биологийн олон янз байдал, малчдын амьжиргаа болон хариуцлагатай нийлүүлэлтийн сүлжээтэй салшгүй холбоотой асуудал юм хэмээн үзжээ. Fashion4Land форумын онцлох оролцогчид төрийн бодлого, бизнес, инноваци, загварын салбар болон урлагийн төлөөлөл байв.
Рики Кеж /НҮБ-ын Цөлжилттэй тэмцэх конвенцын газрын элч, Грэммийн шагналт уран бүтээлч/
Загварын салбар газрын доройтлоос сэргийлэхийн тулд маш их зүйлийг хийж чадна. Хүн бүрийн өдөр тутам өмсдөг хувцасны материал, иддэг хүнс маань бидний тогтвортой байдлыг тодорхойлдог. Учир нь эдгээр түүхий эд хаа нэгтээ ургаж, бий болдог. Миний бодлоор хэт хурдан загварын үйлдвэрлэл нь бидний хувцсыг байнга худалдан авч, нэг удаа өмсөхөд хүргэдэг учраас хамгийн их бохирдол үүсгэдэг салбаруудын нэг. Би хувцсыг нэгээс илүү олон удаа өмсөж, загварлаг байж болно гэж боддог. Дэлхий бидний сүүлийн үдэшлэгээр юу өмссөнийг санахгүй ч түүнд хэрхэн хандаж байсныг маань гарцаагүй санана. Тиймээс загварын салбар илүү чанартай хувцас үйлдвэрлэх чиглэлд шилжих нь чухал гэж бодож байна. Ингэснээр бид хувцсаа дахин дахин өмсөх боломжтой болно. Мөн хэдэн арван жилийн өмнөх шигшээ хувцас худалдан аваад үеэс үед дамжуулан өмсдөг хэвшилдээ эргэн орох хэрэгтэй. Бид хувцсаа хүүхдүүдээ дамжуулдаг, эсвэл эцэг эхийнхээ өмсөж байсан хувцсыг өмсдөг байсан. Тиймээс хэлэх ёстой хамгийн чухал зүйл бол чанартай хувцас сонгож, түүнийгээ дахин дахин өмсөх явдал. “Fashion for Land” арга хэмжээ үнэхээр гайхалтай урам зориг өгсөн арга хэмжээ болсон. Учир нь бүх хувцсыг байгалийн гаралтай ширхэгт материалаар хийсэн байсан. Бидний мэдэж байгаагаар байгалийн гаралтай ширхэгт материал нь биологийн задралд ордог. Тэдгээр нь манай дэлхийг бохирдуулдаггүйгээс гадна олон хүний амжиргааг дэмждэг. Эдгээр нь эдийн засагт, хүмүүст, мөн дэлхийд илүү ээлтэй. Тиймээс энэ нь зөвхөн тогтвортой загвар, тогтвортой материал, байгалийн гаралтай ширхэгт материалын тухай асуудал биш гэж би бодож байна. Миний өмнө хэлсэнчлэн чанартай хувцас сонгож, түүнийгээ дахин өмсөх тухай ч мөн адил юм. Энэ бүх асуудлыг “Fashion for Land” арга хэмжээгээр хэлэлцсэн.
Мөн форумын үеэр цэнхэр болон ногоон бүсэд загварын шоуг зохион байгуулж, урлаг, соёлын төлөөллийг нэг дор нэгтгэлээ. Энэхүү үйл ажиллагааны хүрээнд Монголын ноолуурын загварын кашмерууд хамтран Эх дэлхийгээ хамгаалан хайрлах үйлсийг дэлгэрүүлж, үндэсний өв соёлыг илэрхийлсэн, цаашлаад эх дэлхийдээ ээлтэй, урт хугацааны чанарт хийцтэй, мөн үзэсгэлэнтэй, содон загваруудыг толилуулсан “Fashion for Earth” арга хэмжээ зохион байгуулсан юм.
